Manindahay sa Talisay ibalhin na sa bag-ong multi-purpose bldg

CEBU, Philippines — Sugdan na ang pagbalhin sa mga manindahay sa bag-ong nahuman nga multi-purpose building atbang sa Plaza sa Poblacion, Dakbayan sa Talisay. Ang road clearing himuon karong Huwebes nga maoy kamanduan sa Department of Interior and Local Government (DILG). Ang manindahay taud-taod na nga naninda matag hapon diha kilid sa koral sa simbahan sa Sta. Teresa de Avila.

Diha sila gipahimutang ni kapitan Edward Alesna samtang gitrabaho pa ang multi-purpose building.

Gitigom ni Alesna ang manindahay uban ni Jane Enrile sa Licensing Office ug Edwin Nierves sa Task Force ug gisabot nga tumanon ang mga lagda aron makapadayon sa ilang panginabuhi.

Gihimo nga prayoridad ang manindahay nga taga Poblacion pinaagi sa hangyo ni Alesna. Nanghinaot sila nga unta motuman lang ang tanan kay ang Task Force di magpanuko sa pag imbargo sa mga baligya o estraktura nga imontar daplin sa karsada. (BANATNEWS)