CCMC nakadawat og ARMORRED award

MANILA, Philippines — Nakadawat og pasidungog ang Cebu City Medical Center (CCMC) gumikan sa ilang maayong pagdumala niini .

Ang chief of clinics sa CCMC Dr. Eduardo Camalongay ug ang medical director nga si Dr. Anton Oliver A. Reposar II maoy nidawat sa ARMORRED atol sa 2022 Local Health Systems Awards nga gipahigayon sa niaging gabii diha sa Bai Hotel.

Ang kahulogan sa ARMORRED mao ang Active in Risk Management, Outstanding to Risk Reduction in Emergencies and Disaster.

Nakita sa Department of Health (DOH) Central Visayas Center for Health Development (CVCHD)  ang pag-institutionalized sa CCMC sa ilang  Disaster Risk Reduction Management in Health (DRRM-H) Systems.

Nahimutang sa ikatulong pwesto ang CCMC alang sa maong recognition nga gitagana sa tambalan nga gihuptan sa usa ka local government unit diin nag-una na niini ang  Cebu Provincial Hospital sa  Bogo City ug gisundan sa Garcia Memorial Provincial Hospital sa Bohol .

Lakip sa nakadawat og pasidungog mao ang Siquijor Provincial Hospital ug Pacuan Community Primary Hospital sa Negros Oriental.

Usa si DOH-7 regional director Dr. Jaime Bernadas sa mga nitunol sa og “plaque of appreciation “ ngadto sa mga gipasidunggan.(BANAT NEWS)