Babaye nga wala makabayad sa drugas gipusil patay

CEBU, Philippines — Patay ang usa ka babaye nga giingong wala makabayad sa ginadiling drugas human kini gipusila kagahapon sa kadlawon diha sa MJ Cuenco Avenue, Barangay Carreta, Siyudad sa Sugbo.

Ang biktima mao si Edina Rose Eleola, 28, residente sa Barangay Hipodromo sa nahisgutang siyudad,.

Samtang ang suspetsado mao si Jaime Obeña ug giingong aduna kini laing mga kauban ang padayon pang gipangita sa kapolisan.

Base sa imbestigasyon sa kapolisan sa Police Station 4 ang biktima giingong namaligya kini og ginadiling drugas anha kini magkuhaan og supply sa grupo sa suspek.

Gikataho nga ang suspek maoy kolektor sa mga mokuha og ginadiling drugas sa ilang grupo ug kaduha na kini nga adunay gipatay.

Base usab sa imbestigasyon sa kapolisan nga ang biktima adunay utang ug wala kabayad sa gikuha niining drugas.

“Allegedly ang kaning suspect iyaha ning gitawag ang biktima kay kaila raman ni sila and then iyahang giagni pabayron lang og gamay ug tagaan na sab og bag-o nga butang but pag-abot ilahang gipusil so positively identified ni siya kay ang ka live-in aning atong biktima nia man, present so kaila siya sa suspect mao ni nga nag-conduct ta ron og hot pursuit”, ,matud ni Lieutenant Colonel Wilbert Parilla, deputy city director for administration sa Cebu City Police Office(CCPO).

Matud ni Parilla nga ang biktima gipusil nga anaa ang live-in partner niini.

Nasayran nga si Eleola aduna nay kaso kaniadto sa pagkalambigit sa ilegal nga drugas ug nadakpan kini niadtong tuig 2018 sa Police Station 3 apan nakagawas pinaagi sa plea bargaining ug niining ulahi lang subling nadakpan sa Police Station 3 tungod sa ilegal nga sugal ug nakagawas usab kini.

“Mao na gyud ni trend ron sa mga drug personalities because dili man ni maka-file sila og kaso kong dili mobayad ang gitagaan nila og drugs so katong mo-tumbling ilaha pod pa-tumbling-ngon”, dugang ni Parilla. —BDB (BANATNEWS)