Mga establisamento kinahanglang dunay CCTV

CEBU, Philippines — Gihangyo sa Konseho sa Siyudad sa Sugbo  ang  Cebu Chamber of Commerce and Industry (CCCI) nga awhagon ang mga establisamento  gikan sa pribadong sektor sa pagbutang og closed circuit television (CCTV) camera sa ilang mga hurisdiksyon.

Si Konsehal Renato Osmeña, Jr. nipasiugda og resolusyon kalabot sa maong butang nga giaprobahan sa konseho.

Gihangyo usab sa konseho ang CCCI nga i-require kining mga establisemento sa negosyo nga magbutang og signage nga nagtimaan nga ang lugar gibantayan 24/7 sa CCTV surveillance system, subay sa City Ordinance No. 2381.

Kahinumduman, ang dakbayan nipasar kaniadto sa CO 2381 nga nagmando sa residential subdivisions ug condominiums nga magbutang og CCTC. Suma pa ni Osmeña nga  gikinahanglan aron ang atong komunidad mas luwas ug gyud kini aron mas luwas ang siyudad  ug kini makapugong sa paghimo sa mga krimen o  posibleng mga hulga sa kalinaw sa publiko.

Kalabot niini, gihangyo usab sa konseho ang Cebu City Treasurer’s Office ug ang Peace and Order Council nga mosumitir kanila og status report kalabot sa pagpatuman sa CO 2381 diin gihatagan og gibug-aton ang compliance rate ug ang gidaghanon sa functional CCTV camera nga gigamit.

Niadtong Mayo, ang Department of the Interior and Local Government (DILG) niisyu og Memorandum Circular (MC) No. 2022-060, nga nag-awhag sa tanang local government units sa pag-require sa tanang business establishments sulod sa ilang area of jurisdiction nga magbutang ug upgraded security cameras sa ilang lugar. —/IBM (BANAT NEWS)