Drug den sa brgy Quiot giguba sa PDEA, 4 nasikop

CEBU, Philippines — Giguba sa mga sakop sa Philippine Drug Enforcement Agency(PDEA)-7 Regional Enforcement Team(RSET) ang usa ka drug den sa Sitio Upper Yati, Barangay Quiot, siyudad sa Sugbo atol sa ilang  buybust operation niadtong Lunes sa gabii.

Upat ka indibidwal ang nasikop apil na niini ang drug den maintainer nga nailhan sa ngalan nga Roger Tiquel, 55 anyos.

Ang laing tulo nga nasikop mao sila si Charlie Dacula, 36 anyos, usa ka service crew member; Eulogio Omamalin Jr., 21 anyos, construction worker; ug Jollen Cadiz, 37 anyos, usa ka laborer.

Nasakmit ang pito ka pakete sa gituohang shabu nga motimbang og 10 gramos nga mobalor og P68, 000, buybust money ug nagkalain-laing drug paraphernalia.

Segun sa PDEA niabot og tulo ka semana ang ilang case build-up niini human makadawat og impormasyon gikan sa usa ka concerned citizen. Ang dinakpan giingong maka-dispose og 20 gramos sa gidudahang illegal nga drugas matag semana.

Samtang laing mga barangay sa siyudad sa Sugbo ang gipaabot nga ma deklarar nga drug cleared.  Suma pa sa PDEA)-7 nag-assess na sila sa application sa barangay Kalubihan ug Tabunan aron ma deklarar nga drug cleared barangay ug gipaabot nga mosumitir usab og application ang barangay Agsungot.

Nunot niini, ang tigpamaba sa Cebu City Police Office (CCPO) Police Col. Ma. Theresa Macatangay mihulagway nga kun ang tulo ka barangay hingpit nga madeklarar nga drug cleared nagpakita kini nga epektibo ang ilang gihimong operasyon batok sa illegal drugas.

Gitataw ni Lt. Col. Macatangay dili lang kini kalampusan sa komunidad ug kapolisan sa siyudad apan lakip na sa barangay officials ug sa Local Government sa Unit.

Ang Cebu City dunay 80 ka barangay ug sa pagkakaron 13 niini ang gideklarar nga drug cleared kini gilangkuban sa Sto. Niño, Parian, Sudlon 1, Sudlon 2, Sapangdaku, Buot, San Antonio, Basak Pardo, Pamutan, Toong, Sinsin, Lusaran ug Kinasang-an. MEL (BANATNEWS)