Holganza mohangyo pabalikon ang wala ma-renew nga mga kawani

CEBU, Philippines — Gibutyag ni Atty. Rico Rey Francis “Koko” Holganza, chairperson sa Cebu City Traffic Management Board and Coordination Committee nga mohangyo siya sa buhatan ni Mayor Michael Rama nga ipabilin ang mga kugihan nga personnel ug traffic enforcers sa Dakbayan nga giingong wala ma-renew.

Gikataho nga adunay mga casual ug job orders nga mga empleyado sa city hall ang wala na gi-renew sa ilang trabaho.

Nagkanayon si Holganza nga kapin sa 500 ka personnel sa Cebu City Transportation Office (CCTO) diin sa maong gidaghanon 239 lang niini ang na-renew.

Matud ni Holganza nga nituo siya sa prinsipyo ni Rama nga basta maayo lang sa panarbaho angayan kini nga ipabilin ug dili basehan ang nag-endorsar.

Gikataho usab nga ubay-ubay nga mga empleyado kinsa naggikan sa nagkadaiyang   departamento ang wala ma-renew sa trabaho.

Samtang si Rama gipaniguro niini nga adunay saktong due process sa gihimo nga evaluation alang sa mga empleyado.

Alang usab sa mga dili ma-renew tabangan kini sa kagamhanan nga makakita og laing trabaho.

Sayo pa, si Rama nagkanayon nga ang criteria sa gihimo nga evaluation sa mga empleyado kinahanglang dili kini kawatan, intrigera, tapulan, hugawan, palaaway, walay nahibaw-an, dili mobayad og utang ug mobuko-buko. Gusto ni Rama nga mahimong tulin ang pagdumala sa siyudad uban sa mga tawo nga motrabaho subay sa ilang mandato. BDB (BANATNEWS)