Rama: Sinulog 2023 siguradong ipahigayon sa SRP

CEBU, Philippines — Gipahibalo ni Mayor Michael Rama nga isip kabahin sa paghimo nga sadya ug masidlakon ang South Road Properties  sa umaabot nga Sinulog 2023 pabutangan usab kini og World Tent City.

Nasayran nga gianunsiyo kagahapon ni Rama nga sigurado na nga diha sa SRP ipahigayon ang pagpasundayag sa Sinulog 2023.

Samtang magsingabot ang maong adlaw butangan og area alang sa mga patigayon diha sa SRP isip kabahin sa promotion niini.

Ipahimutang ang mga dayan-dayan gikan sa Hotel, Resort & Restaurant Association of Cebu, Inc. (HRRACI) aron ma-expose kini og samot ngadto sa katawhan.

Samtang ang pangulo sa Cebu Chamber of Commerce and Industry Charles Kenneth Co nipadayag sa pagsuporta sa desisyon ni Rama nga himuon diha sa SRP ang Sinulog 2023.

Sayo pa, gibutyag ni Rama nga adunay dakong hawanan ug daghan ang tawo ang ma-accommodated diha sa SRP hinungdan nga haom kaayo nga anha ipahigayon ang Sinulog sa maong dapit.

Dili na bag-o alang kang Rama ang sugyot niya nga himuon diha sa SRP ang Sinulog diin iyaha na kini nga nahisgotan niadtong tuig 2021 apan wala kini nadayon gumikan kay wala motugot ang Inter-Agency Task Force for the Management of Emerging Infectious Diseases (IATF) tungod sa  nagkataas nga kaso sa COVID-19 niadtong higayona.

Apan karon nga niloag na  ang restriksiyon madayon na gyud ang maong plano. BDB (BANATNEWS)