Usbaw sa pletehan sa PUVs epektibo na karon

CEBU, Philippines — Sugod karong adlawa epektibo na ang bag-ong usbaw sa pletehan sa mga public utility vehicle (PUV).

Apan ang direktor sa Land Transportation Franchising and Regulatory Board-7  Eduardo Montealto, Jr. nipasidaan sa mga PUV nga walay bag-ong fare matrix o taripa nga nga dili makakolekta og bag-ong pletehan.

“Reminder lang sa atong publiko nga pwede pa mo moplete sa karaan nga pletehan kong ang inyong gisakyan wala pa sila’y bag-ong fare matrix o taripa”, matud ni Montealto.

Si Montealto nagkanayon nga ang pagkolekta sa bag-ong pletehan nga walay bag-ong taripa matawag kini og “overcharging”.

Ug ang makahimo sa overcharging aduna kini multa nga P5,000 sa unang kalapasan; P10,000 sa ikaduhang kalapasan ug P15,000 sa ikatulong kalapasan ug impounding sa unit sulod sa 30 ka adlaw.

Matud ni  Montealdo nga gawas sa UV Express ang tanang ubang denominasyon sama sa public utility jeepneys, taxi, bus ug TNVS mopasaka sa ilang tagsa-tagsa ka pletehan  ugma 15 ka adlaw human ang LTFRB board nipagawas og desisyon niadtong Septiyembre 16 , 2022. Alang sa modernized jeepneys, ang bag-ong minimum nga pletehan P14.00 sa unang upat ka kilometro ug P2.20 sa matag mosunod nga kilometro.

Gidugang sa desisyon nga sa tanang provincial buses, ang bag-ong minimum nga pletehan P11.

Ang bag-ong mosunod nga kilometro alang sa ordinaryo nga provincial buses anaa sa P1.90 samtang P2.10 alang sa deluxe provincial buses; P2.35 alang sa S deluxe provincial buses; ug P2.90 alang sa luxury provincial buses.

Alang sa taxi units, ang bag-ong flagdown rate P45 na kini.

Dugang sa nahisgutang desisyon nga ang pag-adjust sa pletehan sa serbisyo sa taxi magamit usab sa serbisyo sa airport taxi nga karon permamente nga gitugotan nga usbawan ang flagdown rate og P15.00 sa ingon nga pagtaas sa rate gikan sa una nga pagkunhod sa flagdown rate nga P60.00 ngadto sa P75.00 ubos sa gahum sa desisyon nga nag-aproba sa pagkunhod sa pletehan nga pinetsahan niadtong Marso 8, 2016 ubos sa case number 2014-19244.

Alang sa TNVS, bisan og nakahukom ang LTFRB nga walay usbaw sa mosunod nga kilometro apan ang flagdown rate sa sedan type P45 samtang P55  alang sa AUV-SUV type; ug P35 alang sa hatchback type.

Giawhag pa sa LTFRB ang publiko sa pagtaho sa ilang 24/7 Hotline: 1342 alang sa mga reklamo sa overcharging ilabina nga nagkakolekta sa bag-ong fare rate o magpadala og mensahe sa LTFRB official Facebook page o sa ilang official nga website. (Gikan sa The Freeman/BDB)