Pagpatuman sa RFID sa CCLEX lugwayan pag-usab

CEBU, Philippines — Gianunsyo sa Cebu Cordova Link Expressway Corporation (CCLEC) nga iuswag na usab sa laing petsa ang implementasyon sa full electronic alang sa toll payments niini.

Karong adlawa na unta, Oktubre 1 ang gikatakdang pagpatuman niini apan tungod sa hangyo sa kadaghanan nga motorista , iuswag nalang kini sa laing petsa.

Sumala pa ni Allan Alfon, President and General Manager  sa CCLEC nga  gikonsiderar nila ang  hangyo sa mga motorista nga wala pa kapataod og RFID sa ilang mga sakyanan.

Adunay 10 toll lanes ang CCLEX , kun diin ang  usa niini kay maoy temporayong area nga modawat og cash  alang sa wala pa kakuha og RFID.

Wala pa hinuoy tataw nga petsa kun kanus-a kutob ang pag-extend niini.

Gitambagan ni Alfon ang mga motorista  nga mokuha na og RFID aron mas tulin o mas dali nga transaksyon sa taytayan.  Dugang pa ni Alfon nga libre ang pagpataod og RFID.

Gidasig usab  sa CCLEC ang mga motorista nga adunay na RFID nga i-reload ang ilang mga account online pinaagi sa MPT DriveHub, usa ka all-in-one  nga application alang sa maong katuyoan.

Gawas sa MPT DriveHub app, mahimo usab nga i-reload sa mga motorista ang ilang CCLEX RFID sa CCLEX Customer Service Centers sa Toll Plaza. Abli kini gikan sa alas 6 sa buntag hangtod sa alas 9 sa gabii, matag adlaw.

Sa mga wala pay RFID, mahimo silang mag-schedule sa ilang installation pinaagi sa pag-adto sa cclex.com.ph.

Sa pagkakaron, duna nay kapin 90,000 ang nagpataod og RFID.  Ang CCLEX karon dunay average nga kapin sa 10,000 ka sakyanan nga moagi matag adlaw , ug 20% niini kay mga  motorsiklo.

Suma pa sa operations manager sa CCLEC nga si Mareon Therese Miole  nga dunay  24/7 nga  traffic control room ang taytayan .

Moabot ngadto sa 84 ka cameras ang giinstalar niini ug aduna kini kapasidad sa pag-zoom-in. —/IBM (BANAT NEWS)