Bag-ong steel bridges padung sa SRP tukoron

CEBU, Philippines — Tulo ka bag-ong steel bridges ang gikatakdang ibutang nga magdugtong sa South Road Properties ngadto sa mainland nga sugdan karong buwana sa Dakbayan sa Sugbu ug sa Department of Public Works and Highways (DPWH)-7.

Ang maong taytayan gipanglantawang makapaluag sa traffic sa SRP viaduct kun kini makompleto na.

Si Engr. Faustino Dela Cruz, Jr., DPWH-7 maintenance division chief, nangulo sa grupo dili pa lang dugay  sa DPWH ug siyudad sa  pagpahigayon og inspeksyon sa mga dapit alang sa bag-ong mga taytayan.

Sa taho sa Public Information Office (PIO) sa dakbayan, adunay kinatibuk-an nga walo na ka mga taytayan  ang SRP sa higayon nga matukod na ang dugang tulo.

Matud ni Dela Cruz nga ilang ihatag ang gikinahanglang materyales alang sa pagtukod sa taytayan.

“Also, our role is, during construction, we are going to supervise and provide technical assistance to complete the bridge projects the soonest, since we committed to have it completed before the Sinulog ( Enero 2023),” matud pa niya.

Unang giduso ni Mayor Michael Rama ang pagtukod sa maong mga taytayan isip pagpangandam sa Sinulog 2023, nga gusto niyang ipahigayon sa SRP.

Si Dela Cruz niingon nga sugdan na nila ang preparatory works sa mga designated sites sunod semana. Ang ilang target mao ang aktuwal nga pag-instalar sa katapusan sa Oktubre o sayong bahin  sa Nobyembre.

Ang mga taytayan mahimong duha ka lane nga steel bridge nga ibutang gikan sa backroad sa SRP nga magdugtong sa White Road sa Barangay Inayawan; usa ka single-lane steel bridge nga nagdugtong sa backroad sa SRP paingon sa Janseen Road sa Barangay Basak San Nicolas; ug duha ka lane nga steel bridge nga nagdugtong sa backroad sa SRP paingon sa Cabreros Street, sa Basak San Nicolas gihapon.

Ang mga  kasamtangan nga mga taytayan mao ang nagdugtong sa SRP ngadto sa Talisay City,  sa Vestil St., usa ka steel bridge sa likod sa property sa SM-Ayala consortium, ug usa ka spillway bridge nga nagdugtong  ngadto sa Inayawan.

Matud ni Dela Cruz nga malaumon sila nga mahuman nila ang instalasyon sa dili pa ang Sinulog sunod tuig, dugang duha ngadto sa tulo ka semana ang pag-instalar ug pagkompleto sa matag taytayan.

Siya miingon nga kining steel bridges ang gamiton tungod kay kini dali nga makuha ug dali nga mabutang.

Ang kagamhanan sa dakbayan ug ang DPWH-7 mosulod og Memorandum of Agreement (MOA) alang sa proyekto.

Ang DPWH-7 ug mga departamento sa City Hall nga hingtungdan padayon nga magtagbo aron magplano alang sa mga buluhaton sa pagpangandam sa lainlaing mga lugar ug uban pang mga kalihokan. —/IBM (BANAT NEWS)