Direktor sa CIDG-7 maoy gustong palingkuron ni Rama sa CCPO
CEBU, Philippines — Gipahibawo kagahapong adlawa ni Cebu City Mayor Michael Rama nga iyahang girekomendar nga mahimong City Director sa Cebu City Police Office(CCPO) ang Regional Chief sa Criminal Investigation and Detection Group(CIDG)-7 Police Colonel Ireneo Dalugdog.
Gibutyag ni Rama sa mga tigbalita nga miagi og proseso sama sa interview sa panel ang maong opisyal gikan sa tulo ka gipapilian. Giklaro sa mayor nga silang tanan kwalipikadong mamahimong CCPO director apan si Dalugdog ang nakita niya ug sa panel nga angayan nga mabutang sa siyudad.
“All of them are qualified but from the panel he was the one who was given and even I concur that he is the one as far as the panel, the group is concern that could articulate what the City deserve to have,” sigon ni Rama.
Gihimug-atan hinoon ni Rama nga kinahanglan gihapon ni Dalugdog nga mopresentar og comprehensive program sama sa kahapsay ug kalinaw, pagpangandam sa Kalag-Kalag, Pasko ingon man Sinulog.
Sa pagkakaron, si Police Col. Ernesto Salvador Tagle ang City Director karon sa CCPO, milingkod kini sa katungdanan niadtong Enero 10, 2022. — /IBM (BANAT NEWS)
- Latest
