CCTO walay pilion nga violator, sakyanan sa konsehal gi-clamp

CEBU, Philippines — Gipamatud-an sa mga tinugyanan sa Cebu City Traffic Office (CCTO) nga wala sila'y pili sa pagsita og violators bisan pa og aduna kini katungdanan sa gobiyerno.

Na-trending kagahapon diha sa social media ang Facebook post sa konsehal sa amihanang distrito sa Siyudad sa Sugbo nga si Jaypee Labella diin makita nga na-clamp ang iyang sakyanan nga giplastada niya overnight diha sa gawas nga bahin sa iyang panimalay sa Barangay Mabolo .

“Patay Sayuha sa Buntag oi. Nakalimot mi sulod sa Sakyanan..Session pa Gyud ko karun..huhu”,  tipik sa post ni Labella kagahapon sa buntag.

Gidayeg ni Labella ang mga tinugyanan sa CCTO nga ni-clamp sa iyang sakyanan gumikan kay nagpakita nga nibuhat gyud kini sa ilang trabaho.

“In order for us to achieve Singapore-like, we should have Discipline walay Pili…Kudos To our CCTO personnel for doing their job”, dugang post ni Labella.

Si Labella nakabayad kini og P1,500 gumikan sa maong violation. Gi-post niya ang hulagway sa iyang sakyanan nga na-clamp ug ang resibo sa iyang pagmulta isip pagpakita nga nisubay gyud siya sa hustong proseso.

Sayo pa, gipadayag sa executive director sa CCTO Paul Gotiong nga walay pili ang ilang operasyon gani adunay mga higayon nga naka-clamp sila og mga sakyanan sa gobiyerno.

Gitataw ni Gotiong nga importante kaayo ang hawan nga dalan aron dili maglisod og agi ang emergency vehicles.

Ang paghingusog sa  pagpatuman sa mga lagda sa trapiko kabahin kini sa mga gipangbuhat sa kagamhanan sa siyudad alang sa tinguha niini nga masusama sa Singapore ang Dakbayan sa Sugbo.

Gani sa giumol nga Oplan Disiplina nga ipatuman ni Mayor Michael Rama sa umaabot nga mga adlaw usa sa mga unod niini ang pagmando sa katawhan nga tumanon gyud ang mga lagda sa trapiko aron makab-ot ang hapsay nga kadalanan.

Nahisgotan usab sa maong kamandoan ang pagtuman sa ordinansa sa siyudad sama sa koleksiyon sa basura , curfew ug uban pa. —BDB (BANATNEWS)