Rama gitugotan sa konseho nga mogama og kasabotan tali sa PhilHealth

CEBU, Philippines — Gitugotan sa Konseho sa Siyudad sa Sugbo si Mayor Michael Rama alang sa paggama og kasabotan alang sa Performance Commitment for Community Isolation Units tali sa Philippine Health Insurance Corporation (PhilHealth).

Giaprobahan sa konseho sa siyudad ang resolusyon nga giduso ni Konsehal Jocelyn Pesquera kabahin sa maong katuyoan.

Matud ni Pesquera nga ang Cebu City Quarantine Center (CCQC) nga usa ka isolation facility nga gidumala sa kagamhanan sa siyudad maoy ipa-accredit sa PhilHealth.

Lakip sa mga pasalig sa CCQC mao ang pagsunod sa mga balaod o mga lagda ug  regulasyon base sa mga administratibong mando ilabi na sa pag-apod-apod sa professional fee component sa PhilHealth payment/reimbursement ngadto sa mga hingtungdan nga mga professional nga dili molapas sa 30 ka adlaw sa pagkadawat sa reimbursement o sa gikatakdang panahon nga gikasabotan sa health care institution (HCI) ug sa ilang mga professional.

Gipasalig usab niini nga ilang sigurohon nga ang pasyente mga miyembro sa PhilHealth nga adunay mga panginahanglan nga lapas sa ilang katakus sa pagserbisyo ilang i-refer sa tukma nga pasilidad sa panglawas nga accredited sa PhilHealth. Gipadayag usab sa performance commitment nga ilang ipaabot ang kooperasyon sa mga giila nga awtoridad sa PhilHealth ug bisan unsa nga ubang awtorisado nga mga personahe ug instrumentalidad aron mahatagan og access sa mga record sa pasyente ug isumite sa bisan unsang hapsay nga pagsusi. BDB (BANATNEWS)