Motor batok trak, usa patay

CEBU, Philippines — Usa ang patay ug duha ang naangol sa disgrasya sa National Road, Barangay Poblacion Danao City kagahapon sa kaadlawon.

Ang nakalas mao si Joel ilogon, 22, taga Barangay Dunggoan Danao, nagmaneho sa Kawasaki Motorcycle color blue ug walay plate number, samtang ang mga naangol mao sila si Jefferson Ilogon, 18, ug usa ka minor de edad.

Ang nagmaneho sa Isuzu Trailer nga adunay plate number Jam 2347 mao si Jason Baclayon, 33 , taga Pangdan sa Dakbayan sa Naga. Base sa imbestigasyon sa duty traffic investigator nga si Police Staff Sgt. Arzie Hill Biatingo uban sa mga kaubanan niini gikan sa managlahi nga direksyon ang nagkabanggaanay sa maong lugar. Matud pa kalit nisarasay ang motor human nawagtangan og kontrol ang drayber niini ug didto kini niigo sa gikasugat nga Isuzu trailer hinungdan nga nangalagpot ang tulo nga nagsakay.

Ang mga biktima giingong nabunal kini ngadto sa sementado nga dalan ug dali pa unta kini gidala ngadto sa tambalanan apan gideklarar ang driver sa motor nga nakabsan sa kinabuhi samtang nagpabilin sa tambalanan ang mga sakay niini.

Ang driver sa sakyanan kasamtangan usa anaa sa kustodiya sa kapulisan samtang nagpaabot pa sa pamilya sa mga biktima kung mopasang-at ba sila og kaso. —IBM (BANATNEWS)