Maayong relasyon sa Pilipinas ug China gipakita sa photo exhibit
CEBU, Philippines — Isip pagsaulog sa 73rd founding anniversary sa People’s Republic of China, adunay photo exhibit nga nagpakita sa maayong relasyon sa China ug Pilipinas.
Gisubhan kagahapon ang maong exhibit nga nahimutang sa North Wing sa SM City -Cebu.
Makita sa gi-display nga mga hulagway ang mga programa sa China alang sa mga Pinoy ug usa na niini ang pag-apod apod og relief goods alang sa mga naapektohan sa kalamidad. Gibutyag sa Consul General sa Kagamhanan sa People's Republic of China nga si Jia Li nga dunay lig-ong relasyon ang Pilipinas ug China nga nagbunga usab sa lapad nga kooperasyon alang sa mga maayong programa sa katawhan.
" In recent years, our two countries have maintained a good relationship with excellent results, working hand in hand for the common development of both countries, " matud pa ni Li.
Dugang pa niya nga usa sa unod sa nahulma nga kooperasyon mao ang pagpanday og mga programa nga motabang sa pagpalambo sa ekonomiya.
"The Photo Exhibition shows you the wonderful moments of China and the Philippines’ mutually-beneficial relationship," dugang pa niya.
Motabang usab ang maong nasud alang sa kalamboan sa agrikultura, imprastraktura, enerhiya, edukasyon ug turismo sa Pilipinas.
"I believe that through our common efforts, the friendship and cooperation between our two countries will move forward to greater heights," dugang pa ni Li.
Ang maong exhibit molungtad hangtud sa Oktubre 2, 2022.
Sa nasayran linibo na ka tonelada nga bugas ang napadala nila dinhi sa Pilipinas lakip na dinhi sa Sugbo aron itabang sa mga nabiktima sa kalamidad.
Nitambong atol sa paglusad sa exhibit kagahapon mao sila si Cebu City Mayor Michael Rama, Bise Mayor Raymond Garcia, Lapulapu City Congresswoman Cindi Chan , Consul General of Korea Song Sewon, Consul General of Japan Yamaji Hideki ,ug ang Vice President sa SM Prime Holdings nga si Marissa Fernan.
Sa iyang speech, gibutyag ni Mayor Rama nga magpadayon ang lig-ong relasyon sa China ug Pilipinas ug napamatud-an na kini sulod sa taas nga panahon.
Iyang giila ang dakong natabang sa maong nasud dinhi sa Pilipinas. —MEL (BANATNEWS)
- Latest