Cebu City mag-dry run sa implementasyon sa Oplan Disiplina

CEBU, Philippines — Ang kagamhanan sa Siyudad sa Sugbo mopahigayon og dry run alang  sa implementasyon sa Oplan Disiplina tulo ka adlaw sa dili pa ang Oktubre 1 ,2022.

Kini ang gibutyag kagahapon ni Mayor Michael Rama kinsa nagmalaom nga makadawat og lapad nga suporta gikan sa katawhan ang maong proyekto.

Matud ni Rama nga tumong sa executive order nga nag-ulohan og Oplan Disiplina mao nga tumanon sa katawhan ang mga lagda sa Siyudad ilabi na sa nalatid sa nagkadaiyang ordinansa.

Pinaagi sa maong dry run makita ang mga butang nga angayan pa nga pauswagon atol sa hingpit nga operasyon niini.

Magsilbi kini nga usa sa mga pamaagi alang sa pagbaton og disiplina sa matag-usa aron magpabiling hapsay ug malinawon ang Siyudad sa Sugbo.

Nahisgotan usab sa maong EO nga adunay regular nga pag-roving diha sa kabaranggayan ang kapolisan ug ubang tinugyanan nga adunay kalabotan sa pagsiguro sa kahapsay ug kalinaw sa siyudad.

Adunay dakong papel usab ang opisyales sa barangay ug nagkadaiyang community leaders aron sa kanunay nga pagpahimangno sa ilang ginsakopan sa pagtuman sa mga ordinansa.

Usa sa giingong unod sa  Oplan Disiplina mao ang  pag-establisar og holding centers sa matag barangay alang sa mga madakpan nga makasupak sa city ordinances.

Gikataho nga pipila sa mga silot sa violators mao ang pagpa-ubos sa community service ug seminar sa  ordinansa ingon man usab ang pagpahinumdom niini kalabot sa konsepto nga Singapore -like Cebu City.

Ang Oplan Disiplina langkuban sa Armed Forces of the Philippines, Philippine National Police, Cebu City Transportation Office, Prevention Restoration Order Beautification and Enhancement, barangay environmental officers, city hall satellite office,  force multipliers ug  uban pa nga mga ahensiya sa gobiyerno.

Sila maoy mohingusog sa pagpatuman sa mga balaud ug city ordinances kalabot sa environment, health, safety sanitation, traffic rules, education ug uban pa. BDB (BANATNEWS)