Preparasyon sa seguridad sa Pista Senyor gisugdan na
CEBU, Philippines — Aron masigurong hapsay ug malinawon ang pagpahigayon sa kapistahan sa Balaang Bata Sr. Sto. Niño sunod tuig gisugdan na sa kapolisan ang preparasyon niini ug nakigalayon na sa mga kadagkuan sa Basilica Minore del Sto. Niño.
Matud ni Lt. Col. Wilbert Parilla, Deputy City Director for Administration sa Cebu City Police Office nga duha na ka meeting ang gihimo nila uban sa kaparian ug ubang hingtungdang ahensiya.
Pipila sa natuki nila ang pagbalik na gyud sa naandan nga kalihukan sa kapistahan sa wala pa miigo ang COVID-19 pandemic.
Wala nay matud mga restriksyon karon gawas lang sa pag-awhag gihapon sa katawhan nga magsul-ob og facemask isip proteksiyon nila kay naa pa ang hulga sa COVID-19.
“Katong mga nag Walk with Mary so other activities mabalik nato karon,” sigon ni Lt. Col. Parilla.
Gilauman sa kapulisan nga karong lugak na ang restriksyon sa COVID-19 mosugwak gyud ang bagang duot sa mga tawo.
Gipasabot ni Parilla minimal nalang gyud kaayo ang mga restriksyon nga ipatuman itandi sa nanglabay nga duha ka tuig atol sa pandemiya.
Kun kaniadto dunay time limit sa pag-adto sa basilica ug gilimitahan ang gidaghanon sa mga tawong makasulod karon dili na kini ipatuman ilabi na kun magpadayon ang menus nga kaso sa COVID-19 sa siyudad sa Sugbo.
“Hopefully maayo ang dagan aron mabalik gyud nato sa normal”, panghinaot ni Parilla.— IBM (BANATNEWS)
- Latest
