Carmen police nag-abli sa ikaupat nila nga “Tindahan Mo, Ablihan ni Tsip”

CEBU, Philippines — Gitugyan sa kapulisan sa Carmen Police Station pinangulohan ni Police Major Eric Gingoyon ang ika-upat nga “Tindahan Mo, Ablihan ni Tsip” ug naghimo sab og feeding program sa dili momenus 80 ka mga bata diha sa ilahang estasyon.

Ang programa gitambungan sa Deputy Provincial Director for Administration sa Cebu Provincial Police Office (CPPO) Police Lt. Col. Tomas Santander, Carmen Vice Mayor Gerard Villamor, mga konsehales ug uban pa.

Tumong sa “Tindahan Mo, Ablihan ni Tsip” nga moakomodar sa panginahanglanon sa mga marginalized Carmenanons.

Ang maong initiatibo naumol gumikan sa ilahang tinguha nga makatabang sa mga naglisod gumikan niining Covid-19 pandemic.

Sa maong kalihukan ang Carmen PNP ingon man ang stakeholders mohatag og grocery items ug motukod og mini-store alang sa mga deserving nga recipients.

Ang ika-upat nga recipient sa “Tindahan Mo, Ablihan ni Tsip” project gikan sa Barangay Ipil, Lungsod sa Carmen mao si Myrna Batiquin, 54, ug kapikas niini nga si Augustine Batiquin, 63, kinsa wala’y trabaho ug naay desperensiya sa panan-aw.

Duna silay onse ka anak ug usa niini dunay espesyal nga panginahanglanon.

Si Myrna nagtrabaho kaniadto isip house helper ug ubang trabaho alang sa ilang inadlaw-adlaw nga panginahanglanon.— IBM (BANATNEWS)