Talisay magdugang og 50 ka eskolar matag tuig
CEBU, Philippines — Madugangan na unya og 50 ka tinun-an nga himuong eskolar ang Dakbayan sa Talisay matag tuig.
Kini human si Mayor Gerald Anthony “Samsam” Gullas Jr. nakigpinirmahay sa memorandum of understanding (MOU) tali sa usa ka non-government organization nga nipasalig nga maoy motabang sa mga kabataan.
Tinguha sa grupo nga makatabang sa mga tinun-an nga kabus aron makapadayon sa ilang pagtungha sa kolehiyo.
Motabang usab sila nga makasulod og trabaho ang mga mogradwar nga tinun-an.
Si Konsehal Eduardo “Digul” Gullas III nipadayag sa iyang kalipay sa maong kalamboan tungod kay mas modaghan ang oportunidad sa Talisaynon nga mga tinun-an.
Si Konsehal Gullas maoy chairman sa committee on education sa konseho sa siyudad.
Lakip sa gipahigayong pirmahanay sa MOU si Cyril Velasco, presidente sa Talisay City Chamber of Commerce Trade and Industry. Sila usab sa iyang grupo sa mga negosyante ang mopahiluna sa mga kabataan sa trabaho nga pwede nila nga masudlan. BDB (BANATNEWS)
- Latest
