Cable cars sa kabukiran gitun-an

CEBU, Philippines — Gitun-an karon sa siyudad sa Sugbu ang posibilidad nga pagbutang og cable cars  o aerial ropeway transit (ART) gikan sa kabukiran  sa Siyudad sa Sugbo aron magamit nga alternatibong transportasyon sa mga residente didto.

Kini apil unya sa mga hisgutan sa umaabot nga labing una nga “Cebu City Mobility Summit : Moving People Not Cars” nga mahitabo karong Septiyembre 26 -27, 2022 nga ipahigayon sa usa ka hotel nga sa siyudad.

Usa sa mga nagdumala sa maong kalihokan mao ang buhatan ni Konsehal James Cuenco kinsa chairman usab sa committee on transportation sa konseho.

Suma  pa sa executive assistant ni  Cuenco nga si Atty. Kent Francisco Jongoy nga gawas nga mopaminos sa trapiko ang cables cars , giingong makapakusog sab kini sa turismo, ug ekonomikanhong kalihokan sa kabukiran.

Ang maong matang sa transportasyon gigamit na sa ubang mga nasod.

Mohatag usab og panahom sa maong  summit mao ang pipila ka representante sa United Kingdom  nga usa pud sa mga ni-sponsor sa maong summit.

Kabahin pud sa programa ang inputs sa mga traffic expert nga gikan sa laing lugar sa Pilipinas.

Kapin sa 80 ka mga indibidwal ang gikatakdang mosalmot sa summit nga nagikan sa  gobyerno ug sa pribadong sektor.

Kining ambisyon nga cable car usa sa nakitang makatampo sa tinguha ni Mayor Michael Rama nga mahimong usa ka Singapore-like ang Cebu City. Tun-an sa mga convenors sa umaabot nga “mobility summit” ang nagkalainlaing sistema sa transportasyon ug trapiko sa Singapore kun mahimo ba kining buhaton dinhi.

Una na nga gipadayag sa mga komitiba sa maong kalihokan nga  kinahanglang sutaon ang kasamtangang sitwasyon sa trapiko sa dakbayan aron mahibaw-an kon unsaon kini pagsagop sa sistema nga anaa sa Singapore.

Sa sinugdan gitawag  kini og “traffic summit,” ug giilisan sa ngalan sa “mobility summit” aron mahimong mas komprehensibo ang kalihokan.

Matud pa sa executive director sa Cebu City Transportation Office  (CCTO) nga  si Paul Gotiong nga  dako kaayo og matabang ang maong kalihokan  isip usa mga pamaagi sa pagkab-ot og dugang mga ideya alang sa pag-umol og komprehensibong master plan  alang sa sitwasyon sa  trapiko sa dakbayan. —IBM (BANATNEWS)