E-sabong gironda sa NBI, 39 nadakpan

CEBU, Philippines — Dul-an sa 40 ka mga tawo ang nasikop sa mga tinugyanan sa National Bureau of Investigation Central Visayas sa gihimo nilang operasyon batok sa electronic sabong o e-Sabong diha sa Barangay Calajoan, Lungsod sa Minglanilla.

Ang maong operasyon gihimo niadto pang Septiyembre 16, 2022 apan kagahapong adlawa lang human napasaka ang kaso batok sa mga dinakpan gipublikar sa NBIA ang ilang gihimo.

Ang NBI-Central Visayas nisikop sa mga giingong duha ka mga operators niini ug 37 nila ka mga trabahante nga maoy nagpadagan sa operasyon.

Ang gironda mao ang Amenic N’ Calajoan pinasikad sa search warrant nga giluwatan ni Judge Grace Fernandez, sa Regional Trial Court Branch 19, sa Cebu City.

Ang giingong operators giila sa NBI-7 nga mao sila si Carlos Uy Gothong III alyas “Junjun Gothong”ug Sergio Lu  alyas “Sergio Ong, Dongdong Ong.” Ang mga dinakpan naglakip og 20 ka lalaki ug 19 ka mga babaye.

Nasakmit gikan sa raid ang mga ekipo nga mobalor og dul-an sa P2 milyones nga gamiton sa pagpakita sa mga sultada diha sa internet,  lakip usab ang kita nga kwarta nga moabot ngadto sa dul-an sa P3 milyones.

Ang mga nasikop nga mga trabahante naglangkob sa cameramen, wi-fi maintenance crew, VIP room in-charge, bet encoders, IT maintenance personnel ug uban pa.

Ang maong cockpit operation sa e-sabong walay permit gikan sa Philippine Amusement and Gaming Corporation sumala pa sa mga tinugyanan sa NBI-7.

Kung mahinumduman si President Rodrigo Duterte nipahunong sa online nga sabong niadtong bulan sa Mayo tungod sa matud pa dili maayong panag-ingnan niini sa kabataan ug makaguba sa komunidad tungod daghan ang na-ungo sa sugal.

Ang mga dinakpan gikasohan og kalapasan sa Republic Act 10175 or the Cybercrime Prevention Act of 2012 ug Presidential Decree 449 or the Cockfighting Law of 1974.— Rowena D. Capistrano/IBM (BANATNEWS)