Opisina nga mopatuman sa balaud sa habal-habal drivers giduso
CEBU, Philippines — Human nihangyo ang konseho sa pagbanhaw sa City Ordinance No. 1436 o Motorcycle-For-Hire Regulatory Board , adunay ordinansahon karon nga magmugna og Motorcycle-for-Hire Regulatory Office (MHRO).
Giduso na kini ngadto sa Committee on Laws, Ordinances, and Styling ingon man sa Committee on Transportation alang sa dugang pagtuon.
Si Konsehal Pastor “Jun” Alcover, Jr. gihapon ang nangamahan sa maong ordinansahon.
Usa sa nahisgutan niini mao ang panginahanglan sa paghimo og usa ka opisina nga magsilbi nga implementing arm sa mga polisiya o programa sa regulatory board.
Ang Seksyon 3 nag-ingon nga ang MHRO kinahanglan nga gilangkoban sa mga co-terminus personnel nga gitudlo sa City Mayor.
Kini pangulohan sa usa ka executive director.
Lakip sa mga gimbuhaton sa MHRO mao ang paglihok isip Secretariat sa Motorcycle-for-Hire Regulatory Board; pagpatuman sa mga polisiya o programa nga gihimo sa maong board; pagkonsolida sa database alang sa mga akreditado nga "habal-habal" drayber; ug paghimo og mga linkage sa lain-laing asosasyon sa mga drayber sa habal-habal.
Makig-alayon usab kini sa Cebu City Traffic Office kalabot sa mga butang nga nalambigit sa gitakdang mga rota o terminal alang sa mga habal-habal drivers nga giproklamar sa Motorcycle-for-Hire Regulatory Board.
Sa higayon nga maaprobahan, ang minimum nga kantidad nga P2 milyones matag tuig, gamiton kini alang sa dinalian nga pagpatuman sa mga probisyon sa ordinansa.
Ang konseho una nang nihangyo kang Mayor Michael Rama nga ipatawag ang Motorcycle-For-Hire Regulatory Board aron matubag ang mga concern sa mga habal-habal driver sa dakbayan.
Sa usa ka privilege speech, si Alcover niingon nga 30 na ka tuig sukad napasar ang ordinansa apan ang mga programa ug polisiya bahin sa mga habal-habal drivers wala gihapoy konkreto nga direksyon. —MEL (BANATNEWS)
- Latest