Durugista, sugarol sikop atol sa operasyon sa kapolisan

CEBU, Philippines — Nikabat ngadto sa P136,000 ang kantidad sa shabu nga nasakmit sa mga sakop sa City Intelligence Unit (CIU) sa Mandaue City Police Office (MCPO) gikan sa suspetsadong pusher atol sa buy bust operation niadtong Domingo sa gabii diha sa Barangay Casuntingan, Dakbayan sa Mandaue.

Si Police Major John Roy Lalamonan niila sa ilang nadakpan nga mao si Espencer Taquemora, 33-anyos, taga Barangay Mambaling sa Siyudad sa Sugbo.

Gibutyag ni Lalamonan nga nakadawat sila og taho kalabot sa ilegal nga kalihokan sa suspetsado diha sa lugar.

Nasakmit sa kapolisan gikan sa suspetsado ang 50 gramos nga shabu.

Ang suspetsado natingkagol karon sa diha sa detention cell sa MCPO ug gikatakdang pasakaan og kasong kalapasan sa Akta Republika 9165 kun “Comprehensive Dangerous Drugs Act of 2002”.

Samtang laing tulo ka tawo ang nasikop atol sa gipahigayong buy-bust operation sa kapolisan sa Pardo Police Station kagahapon sa kadlawon diha sa Barangay Bulacao ug Inayawan, Dakbayan sa Sugbo.

Ang nasikop naila nga si Bram Philip Villarba, 32, taga Barangay Bulacao, nasakmit gikan kaniya ang 100 gramos nga shbau nga nibalor ngadto sa P680 mil.

Sa Barangay Inayawan, nasikop usab sila si Juanito Labalan, 54 ug Theresa Jersly Raraisi, 26, nasakmit gikan kanila ang 10.28 gramos nga shabu nga nibalor ngadto sa P70 mil.

Sa laing bahin, usa ka menor de edad ang na-rescue ug laing lima ka tawo ang nadakpan tungod sa pagkalambigit nila sa ilegal nga swertres diha sa Barangay Tapon, Lungsod sa Dumanjug atol sa gipahigayong anti-illegal gambling operation sa mga sakop sa Regional Intelligence Division.

Nasikop sila si Gwendolyn Ricardel, 36, taga Barangay Minolos, Rosalie Villalon, 31, taga Barangay Balaygtiki, Lougie Pasatiempo, 28, taga Barangay Candabong, Josephine Colinares, 43,ug Arnel Cabonilas.

Ang maong mga suspetsado naaktohan sa kapolisan nga nag-isyu og ilegal swertres diha sa maong lugar.

Nasakmit gikan sa mga suspetsado ang mga ilegal number game paraphernalia ug ang kwarta nga giingong mga pusta. Rowena D. Capistrano/BDB (BANATNEWS)