Mga rider gitinguhang ipaubos sa basic rescue trainings
CEBU, Philippines — Gitinguha karon sa kagamhanan sa Siyudad sa Sugbo nga ipaubos sa lapad nga basic rescue trainings ang pipila ka motorcycle riders aron adunay makatabang o makaresponde dayon kon anaa kini diha sa duol sa mga lugar nga adunay nadisgrasya o naapektohan sa kalamidad.
Matud ni Dr. Alice Utlang, special assistant to the mayor for special projects nga ubay-ubay na nga grupo sa riders ang nipadangat og interest sa pagsalmot niini.
Nagkanayon si Utlang nga ilaha na karong gihan-ay ang petsa alang sa pagpahigayon niini.
Si Utlang nagkanayon nga gawas sa pagpa-ubos sa basic rescue training adunay ubang riders nga intresado nga motabang sa beautification program sa kagamhanan sa Siyudad sa Sugbo.
Si Utlang nakanayon nga usa kini sa paghatag og katumanan sa lapad nga kooperasyon sa kagamhanan ug sa mga konsituwente niini alang sa pipila ka mga programa. Gawas sa riders giingong dunay ubang sektor ang motabang gihapon sa kagamhanan alang sa pagkab-ot sa mga nindot nga proyekto. BDB (BANATNEWS)
- Latest
