Kapolisan sa TCPS magpakahanas

CEBU, Philippines — Magbansay-bansay sa paggamit sa ilang armas ang kapolisan sa Dakbayan sa Talisay aron mas mohanas sila sa paggamit niini pagprotektar sa katawhan ug sa ilang kaugalingon sa pagbuhat nila sa ilang trabaho

Kini samtang gipaspasan na ang pagporma og kaugalingon niining Special Weapons and Tactics unit.

Si Police Lt. Col. Randy Caballes, pangu sa kapolisan nibutyag nga nahibawo na sila sa paggamit sa ilang armas matag usa apan mas labing maayo nga hanas gyud sila paggamit niini ug mahimo lang kini kun sila kanunay magbansaybansay.

Una niini, duha na ka panghitabo nga ang kapolisan nasuwayan sa mga badlungon sa katilingban ug sila napugos sa pagpusil.

Pero giklaro ni Caballes nga kadtong mga panghitabo naa na gyud sa delikado nga kahimtang ang iyang sakop hinungdan nga na neutralize ang mga suspek.

Matud pa niya nga kung mahimo nga maestoryahan ang tawo nga magpabadlong estoryahan apan kung ang kinabuhi na sab sa kapolisan ang mabutang sa peligro angay sab nga gamiton ang ilang pagbansay sa paggamit sa armas.

Si Caballes miingon nga sa dili pa matapos ning tuiga posibleng matinuod na ang tinguha nilang magporma og kaugalingong SWAT team kay naaprubahan na sa konseho ang paggahin og pundo para sa ilang trainings ug mga kagamitan sa kapolisan.

Matud pa niya nga andam na ang iyang mga sakop nga maoy molangkob sa duha ka grupo sa SWAT nga magbase gyud sa siyudad.

Asoy pa ni Caballes nga mas maayo gyud nga adunay SWAT ang Talisay gumikan sa nagpadayon nga pagdako sa populasyon sa siyudad. —/IBM (BANAT NEWS)