Buhatan alang sa LGBTQ sa Cebu City Hall aprubado na
CEBU, Philippines — Pormal na nga gipirmahan ni Cebu City Mayor Michael Rama ang City Ordinance No. 2660, nga nag-ila sa mga miyembro sa Lesbian, Gay, Bisexual, Transgender, and Queer (LGBTQ) community ug nagmugna og special body nga nanalipod kanila ug nag-atiman sa ilang kaayohan.
Matud pa sa mayor nga haom kaayo ilabi na nga bag-ohay lang gisaulog ang Pride Month niadtong Hulyo. Sa report sa Cebu City Public Information Office , si Sangguniang Kabataan Federation-Cebu City Chapter President Jessica Resch maoy nagtagik sa maong ordinansa.
“This is timely because the City will now have a body that will help fight discrimination among the members of the LGBT and bag-o ra ta na human sab sa PRIDE month,” suma pa ni Mayor Rama.
Ang maong special body ginganlan og "SOGIESC Pride Empowerment Council" o (SPEC),nga gitahasan sa pagtuboy sa batakang kaligdong sa tawo ug pagsilot sa mga makalapas niini.
Ang ordinansa naghatag usab og silot alang sa mga nakalapas niini nga sama sa malisyoso nga pagpakaulaw sa usa ka tawo sa publiko tungod sa sekswal nga orientation niini; pagpahamtang og pisikal nga kadaot sa usa ka indibidwal ;
pagsamok, pagpang-harrass, pagpanghulga, ma-verbal man o pisikal;
pagpailalom sa indibidwal sa mga komedya, mga kataw-anan, ug humor based sa sexual orientation niini.
Ang mga molapas niini kay adunay silot nga tulo ngadto sa unom ka buwan nga pagkapriso nga adunay multa nga P3,000 ngadto sa P5,000, depende sa mga kalapasan o disgresyon sa korte.
Ang SpeC usab ang modumala sa pag-umol og mga programa ug mga inisyatibo nga nakaponting sa gender and development plan sa siyudad, ingon man sa pagpahigayon og information drive aron mapataas ang kahibalo sa mga isyu bahin sa LGBTQ community. —/IBM (BANAT NEWS)
- Latest