Sud-gawas sa prisohan gipatay
CEBU, Philippines — Usa ka 22-anyos nga fratman nga giingong nagsulod-gawas na sa prisohan tungod sa nagkalain-laing kalapasan sa balaod ang napalgang patay nga dunay daghang samad pinusilan sa kalawasan diha sa Sitio Campinsa, Barangay Manipis, Dakbayan sa Talisay niadtong Miyerkules sa gabii.
Ang biktima naila nga si Raymond Tabanas Nadera, 22, taga Barangay Lawaan 3 sa nahisgutang siyudad.
Si Police Lt. Col. Randy Caballes, pangulo sa kapolisan sa Talisay nibutyag nga usa ka residenti sa dapit ang nakadungog nga adunay naabot nga motorsiklo diha sa ilang dapit.
Wa magdugay nakadungog siya og sipang buto. Paglabay sa pipila ka gutlo duna nagkagubot na ang mga tawo tungod sa napalgang patay’ng lawas sa biktima.
Nakaangkon og samad pinusilan ang biktima diha sa iyang nawong ug uban parti sa kalawasan Ang mga nirespondeng polis nakarekuber og kabhang sa kalibre .45.
Matud pa ni Caballes nga gi pick-up ang biktima gikan sa ilaha ug gipasakay og motorsiklo.
Matud pa ni Caballes usa ka drug surrenderee kini niadtong 2016, nadakpan sa kasong paghupot og armas niadtong tuig 2017 ug nadakpan na sab tungod sa ilegal nga drugas niadtong tuig 2018.
Si Caballes nitataw nga gisubay nila ang anggulo sa kalambigitan sa ilegal drugas sa pagpatay sa biktima lakip na sab ang iyang personal nga mga kalihokan nga posibleng maoy nakaingon sa pagpatay kaniya.— IBM (BANATNEWS)
- Latest
