Mayor Suan subling mopasusi sa kadagatan sa Cordova

CEBU, Philippines — Gitinguha ni Cordova Mayor Cesar "Didoy" Suan ang subli nga pagpahigayon og pakisusi sa kadagatan sa Lungsod sa Cordova ilabi na sa mga dapit nga nahimutangan sa fixed ug mga floating cottages.

Gipahibalo sa mayor ang mao niyang tinguha atol sa panagtagbo nga iyang gihimo uban sa mga tag-iya ug operator sa mga establisamento niadtong Agosto 17, 2022.

Sa maong tigum gipadayag ni Mayor Suan ang migawas nga resulta sa laboratory test sa kadagatan sa Lungsod sa Cordova nga taas ang fecal coliform bacteria o kagaw nga makuha gikan sa hugaw sa tawo.

Si Mayor Suan miingon, nga sa una ug ikaduha nga resulta sa laboratory test sa water sample maoy nakita ang high level sa fecal coliform niini.

Si Gobernador Gwen Garcia mihukom nga temporaryong ipahunong ang operasyon sa fixed ug floating cottages karong Agosto 29, 2022.  Nunot niini iyang gitagsa-tagsa sa paglakbit ang mga kalapasan nga nahimo sa mga operator sama sa Clean Water Act, Sanitary Code, walay business permit ug uban pa. —MEL (BANATNEWS)