Estado sa sister cities sa siyudad gisusi
CEBU, Philippines — Dunay mga deligasyon gikan sa laing nasud ang intresado nga mobisita dinhi sa siyudad sa Sugbo atol unya sa subling pagbalik sa pisikal nga pasundayag sa Sinulog karong tuig 2023.
Uban sa paglugak na sa mga restriksyon, naghinamhinam na ang kagamhanan sa pagpalig-on sa maayong relasyon sa mga sister cities niini.
Susihon sa Cebu City Sister City Commission (CCSCC) ang istado sa ilang pakigtambayayong karon sa mga dakbayan sa laing nasud aron masuta kon angay ba kining nga i-revive o dili.
Nahisgotan kini atol sa tigom sa mga miyembro sa komisyon.
Nagtinguha ang siyudad mga makabaton og daghang sister cities.
Sa miaging duha ka tuig, ang commission halos mihunong sa operasyon tungod sa COVID-19 pandemic nga nagpugong sa mga pagbiyahe sa international destinations.
Sa kasamtangan nga record, ang siyudad adunay aktibong relasyon sa Yeosu City, South Korea; Kaohsiung City, Taiwan; Xiamen City, China; ug Haarlemmermeer, Netherlands.
Ang CCSCC miuyon sa paghimo sa usa ka pagtuon ug pagtimbang-timbang sa uban pa nga mga sister cities aron madesisyonan kun ipadayon pa ba kini o dili.
Ang nahisgutang mga dakbayan naglakip sa Salinas, California; Chula Vista, California; Seattle, Washington; Guadalajara, Mexico; Kitchener, Ontario; Honolulu, Hawaii; Parramatta, Australia; Sabrosa, Portugal; Izmir, Turkey; Barcelona, Spain; ug Thessaloniki, Greece. MEL (BANATNEWS)
- Latest
