Mga mopalit og kinawat gimonitor sa kapolisan sa Talisay
CEBU, Philippines — Giangkon sa kapolisan sa Dakbayan sa Talisay nga ila nang gimonitor ang mga tawo nga mopalit og mga kinawat nga motorsiklo o bisan unsa nga butang.
Kini human sila nakadakop og notadong kawatan o motornapper didto sa barangay Tabunok niadtong miaging kadlawon.
Ang nasikop mao si John Methew Sy Canindo, 20 anyos nga taga sitio Mangga barangay Bahay, lungsod sa Sibonga.
Nasita siya sa mga nagroving nga polis tungod kay wala naghelmet apan nisutoy kini sa pagpadagan hinungdan nga nahitabo ang ginukdanay.
Tuod man wala siyay lisensya ug walay dokumento sa motorsiklo.
Nakuhaan sab siya og lima ka pakete sa shabu ug nahibaw-an nga ang motor nga iyang gigamit kinawat niya sa Dakbayan sa Toledo.
Si Police Lt. Col. Randy Caballes, pangu sa kapolisan mitug-an nga gikan sa tuig 2019 nakahimo na og krimen ang dinakpan hangtud sa 2020 ug hangtud karon.
Iyang modus mao ang pagpakiluoy sa mga tawo hangtud nga iyang makuha ang pagsalig niini ug dayon manghuwam na og mga butang sama sa motorsiklo ug dili na niya kini i uli.
Matud pa ni Caballes nga naghuwat sila sa uban pa nga nabiktima ni Canindo aron sa pagpasaka pa og kaso.
Samtang sila nagmonitor na sa mga tawo nga kauban sa dinakpan ug sa mga tawo nga iyang baligyaan sa iyang kinawat nga mga butang. MEL (BANATNEWS)
- Latest