Kaso sa dengue sa Central Visayas nisaka

CEBU, Philippines — Ang gidaghanon sa kaso sa dengue sa Central Visayas padayon nga nisaka base sa ulahing datos sa regional health office.

Base sa report sa Department of Health-7 sa Agosto 13, 2022 aduna kini natala nga 11,403 nga kompirmadong kaso sa dengue diin 72 niini ang namatay.

Ang Cebu Island aduna kini 74 porsyento sa Central Visayas nga total number sa confirmed cases kini base usab sa samang datos sa DOH-7.

Nakatala ang Cebu Province og 4,457 ka kaso ug 27 ang namatay samtang ang Cebu City adunay 2,086 ka kaso ug 25 ang gidaghanon sa namatay.

Ang Lapu-Lapu City ug Mandaue City nakatala og 1,244 ug 621 dengue cases diin 10 ang namatay sa Lapu-Lapu City ug upat sa Siyudad sa Mandaue.

Samtang ang Siquijor aduna kini 90 ka dengue cases hinuon walay namatay, sila usab ang adunay pinakaubos nga dengue patients sa Central Visayas.

Gipanglantawan sa DOH-7 nga ang tuig 2022 usa ka dengue epidemic year diin pasabot niini nga ilahang gilaoman na ang surge sa kaso sa dengue karong tuiga.

Kini maoy ilang naobserbahan sa nilabay’ng mga katuigan diin ang Central Visayas nakasinati og resurgence sa dengue infection matag tulo ka tuig. 

Gipadayag sa regional health office ang ilahang mga pahimangno sa publiko nga siguraduhon ang palibot libre, walay containers o mapundohan og tubig. BDB (BANATNEWS)