Mga pagdahili sa yuta nasinati sa mga barangay sa Cebu City

CEBU, Philippines — Base sa datos sa Cebu City Disaster Risk Reduction and Management Office (CCDRRMO) nga pito ka pagdahili ug paghulpa sa yuta ang nahitabo sa mga barangay sa Siyudad sa Sugbo niadtong adlaw’ng Domingo.

Matud ni Raquel Arce, pangulo sa CCDRRMO nga ang insidente sa landslide nahitabo sa Barangay Pamutan, Pit-os, Buhisan ug Kalunasan samtang adunay paghulpa sa yuta nga nahitabo sa Barangay Agsungot.

Aduna sila’y natala nga tulo ka insidente sa pagdahili sa yuta diha sa nagkalain-laing sitio sa maong barangay.  Hinuon walay gikatahong naangol sa atol sa maong mga insidente.

Gibutyag ni Arce nga nagpatuman sila og force evacuation sa mga residente diha sa mga bukirang barangay human sa nahisgutang hitabo.

Niabot ngadto sa 80 ka indibidwal ang ilahang napabakwit gikan sa ilahang mga lugar.

Nasayran nga 13 ka pamilya o niabot ngadto sa 50 ka indibidwal ang gipabakwit sa Barangay Kalunasan ug pito ka pamilya o 30 ka indibidwal ang gipapahawa sa ilahang mga panilamay diha sa Barangay Pit-os.

Giingong ang maong panghitabo resulta kini sa mga pag-uwan nga nasinati sa siyudad sulod na sa pipila ka adlaw diin ang yuta nihumok.

Samtang nagpadayon ang dili maayong lakat sa panahon dili una tugotan nga makapauli sa ilahang mga panimalay ang mga gipabakwit tungod kay delikado ug risgo kini kanila.

Samtang ang pangulo sa Department of Social Welfare and Services (DSWS) Portia Basmayor nagkanayon nga nanghatag sila og relief good sa mga naapektohan sa Barangay Pit-os ug Kalunasan. BDB (BANATNEWS)