Zafra nagplano sa pag-umol og task force alang sa kampaniya sa curfew

CEBU, Philippines — Naglaraw si Konsehal Phillip Zafra nga mag-umol og task force aron motabang sa pagpatuman sa lapad nga kampaniya sa curfew alang sa mga menor de edad.

Ang maong task force langkuban sa Department of Social Welfare and Services (DSWS), Department of Social Welfare and Development (DSWD), kapolisan, GAD, Department of Labor and Employment (DOLE), opisyales sa barangay ug uban pa nga mga grupo nga manginlabot sa maong kampaniya.

Matud ni Zafra nga aduna gyu’y mga menor nga magsuroy gihapon panahon sa lawom nga kagabhion hinungdan nga giawhag niya ang mga ginikanan nga mohatag og kooperasyon pinaagi sa pagpahimangno sa ilang anak kalabot sa curfew. Tumong sa maong lakang nga maprotektahan ang kabataan gikan sa mga daotang elemento.

“Wala man gyud ta gahuna-huna anang violation, ang atong gi-highlight nga maprotektahan sila”, matud ni Zafra kinsa mao usab ang chairman sa committee on peace and order sa konseho.

Giawhag usab niya ang mga barangay nga mohimo og subsob nga pag-roving.

Susihon usab niya ang ubang mga lagda kalabot sa curfew aron masuta ang mahimong madungag niini.

Samtang gipasabot ni Zafra  nga nalakip ang Department of Labor and Employment sa task force gumikan kay gusto niya mahimoan usab og lakang ang  report nga adunay mga menor nga nagtrabaho panahon sa kagabhion.

Ug klaro nga gidili kini hinungdan nga importante ang lapad nga pakisusi gumikan kay basin posibleng adunay matabang o mahatag nga solusyon ang maong ahensiya.

Hinuon iyaha pa nga ipresenta sa iyang mga kaubanan sa konseho ug sa executive department ang iyang tinguha alang dugang mga ideya. — (/BDB) (BANAT NEWS)