Pipila sa mga apektado sa clearing operation wa pa matabangi
CEBU, Philippines — Dunay mga residente sa Barangay Mambaling sa Cebu City kansang mga panimalay naa sa sud sa 3-meter easement zone sa tampi sa Kinalumsan River nga apil sa gikatakdang demolison mihangyo nga dili una gub-on ang ilahang panimalay kay matod pa wala pa sila kadawat og ayuda gikan sa kagamhanan sa siyudad.
Ang siyudad nagpadayon sa clearing operation sa mga estraktura nga naa duol sa
Kinalumsan River aron mabawi na sa siyudad ang 3-meter easement.
Kagahapon nipatighulog sila sa sa sapa sa C. Padilla nga boundary sa Barangay
Mambaling ug Duljo-Fatima.
Dunay mga residente sa lugar ang nakig-estorya sa mga tinugyanan sa Division for
the Welfare of the Urban ug mipaabot sa ilahang kabalaka nga gub-on na ilahang mga
panimalay apan wala sila’y tabang nga nadawat.
Sila si Juliet Bacalso ug Alma Genesis pulos matod pa wala makadawat og ayuda gikan
sa siyudad mipadayag sa ilahang kabalaka kun asa sila mopuyo ug ilang mga pamilya nga mga
persons with disability kun gub-on na ang ilahang panimalay.
Gipasabot hinuon nila nga mopahawa sila apan kinahanglang hatagan sila og hinabang
aron makapangita og kabalhinan ug dunay ikapatukod nga pinuy-anan sa mas luwas nga lugar.
“Mao na among gihangyo kung gub-on man gani kay ang wala man gyud tay mahimo kanang
tagaan sab ‘ta mi og hinabang kay para ma-start namo asa mi puyo, mangabang ba og balay
pareho anang akong Mama ug Papa 75 na edad asa man tawon na nako ilabay ipaanod nalang nako
na sapa?” ni Genesis pa.
Si Jennifer Alviola Administrative Aide sa DWUP miasoy ang concern sa pipila ka mga
residente ilahang ipaabot ngadto sa DPWH tungod kay proyekto man kini sa maong ahensiya sa
gobiyerno. Ang maong flood control project sa DPWH niadtong tuig 2016 pa kini gisugdan.
Ang dakbayan igo rang nitabang alang sa paspas nga implimentasyon sa proyekto sa gobiyerno.
“Sa pagkakarona dili pa sila gub-on kay wala man sila mabayri, amo sa ning sabutan
ug mitingan namo,” ni Alviola pa.
Samtang si Konsehal Jerry Guardo, Chairman sa Committee on Infrastructure miasoy
nga paingon na sila bukana sa Kinalumsan River nga boundary sa Mambaling sa Duljo Fatima
paingon na sa South Road Properties (SRP).
Sa Barangay Duljo Fatima 203 nga apektado sa clearing operation 182 naa ng
nahatagan og financial assistance ug 21 ang wala pa, samtang sa habig sa Barangay Mambaling
314 ka pamilya apektado, 297 ra nila ang nabayran na samtang ang wala pa.
“Kani maoy pinakadaghan gyud kaayo nga informal settlers nga nasulod gyud sa 3-
meter easement, grabe gyud kaayo ang encroachment unya dako man sad kaayo according sa
study sa drainage master plan kinahanglan gyud padak-an og maayo tungod sa dako kaayo nga volume gikan sa bukid,” ni Guardo pa. Sa pagkakaron, kadtong naapektahan sa clearing nga wala pay kabalhinan anha ibutang
sa tukorong tent city sa lima ka ektarya nga luna diha sa South Road Properties. Si kanhi konsehal Gerry Carillo, chairperson of the Disaster Council miingon nga ang City Disaster
Risk Reduction and Management Office (CDRRMO) miingon nga ang uban naa nipasilong sa mga publikong tunghaan.
Sumala pa ni Carillo, adunay lima ka ektarya nga luna sa SRP nga pahimutangan ug mga container vans nga temporaryong kapuy-an sa mga apektado nga pamilya samtang tukoron pa
ang Medium Rise Building sa may Barangay Tejero ug Duljo Fatima nga permanente nilang kapuy-an kun sila kwalipikadong benepisaryo. (BANAT NEWS)
- Latest