Tulo ka suspetsadong durugista sikop sa buy-bust
CEBU, Philippines — Tulo ka suspetsado nga durugista sikop atol sa pagpangronda sa mga sakop sa Philippine Drug Enforcement Agency-7 Regional Special Enforcement Team diha sa usa ka drug den sa Barangay Carreta, Dakbayan sa Sugbo niadtong Martes sa gabii.
Ang nasikop mao si Rosalinda Baylosis, alyas “Aicelle”, 38-anyos, biyuda, walay trabaho ug tigmentinar sa drug den.
Nasikop usab ang mga parokyano niini nga sila si Charles Misa, 19-anyos ug Roberto Mayormita, 42, walay trabaho.
Nasakmit gikan sa mga suspetsdo ang pito ka putos nga shabu nga nitimbang tanan ngadto sa 10 gramos nga nikantidad tanan ngadto sa P68 mil, buy- bust money ug kagamitan sa pagsuyop.
Matud ni Leia Albiar-Alcantara, tigpamaba sa PDEA-7 nga ang ilang team nipahigayon og duha ka semana nga case build up una natigayon ang maong operasyon.
Gibutyag ni Alcantara nga base sa nadawat nila nga report ang subject makadispatsar og 30 gramos nga ginadiling drugas matag semana.
Ang mga suspetsado gikatakdan pasakaaan og kasong kalapasan sa Akta Republika 9165 kun “Comprehensive Dangerous Drugs Act of 2002”. —BDB (BANATNEWS)
- Latest
