P100M ihatag ni Pangilinan alang sa padayong pagtukod sa CCMC

CEBU, Philippines — Nakakuha og major boost ang pagtukod sa Cebu City Medical Center (CCMC) human ang business tycoon nga si Manuel V. Pangilinan mipasalig og P100 million alang sa pagkompleto sa usa ka andana sa maong 10-storey facility. Base sa report sa Cebu City Public Information Office ang pasalig ni Pangilinan giselyohan dihang si Mayor Michael Rama ug ang ubang opisyales sa Cebu City Hall nakigkita kang Pangilinan niadtong Martes, Agosto 9 didto sa Makati.

Suma pa sa mayor nga ang iyang pag-adto sa kaulohan maoy kabahin sa series of meetings sa mga businessmen nga gitawag niya og “marathon investment begging”.  Nagkanayon si Mayor Rama nga ang mga meetings niini tali sa mga businessmen ug possible investors sa Manila kabahin sa iyahang tinguha nga Singapore-like Cebu City.

Gipasabot ni Rama nga dili makab-ot ang tinguha niya nga Singpore-like Cebu City kun dili siya manghangyo sa mga tawo nga makatabang aron kini matuman.  Matud pa dunay grupo sa mga Filipino-Chinese Investors ang mipasalig nga mohatag og resources aron makatigom og P100 million alang sa pagkompleto sa laing andana sa CCMC.

Padayon karon ang pagtukod sa CCMC aron hingpit na nga makompleto ang ika-walo ngadto sa ika-napulo nga andana sa maong tambalanan.

Gawas sa pasalig nga tabangan nga mahuman ang usa ka andana sa CCMC, si Pangilinan  mipadayag sab sa iyahang interest nga motukod og tambalanan sa Cebu City ubos sa Metro Pacific Investment Corporation. —MEL (BANATNEWS)