Ayuman gitudlo nga secretary on special projects sa siyudad
CEBU, Philippines — Pormal na nga gitudlo ni Cebu City Mayor Michael Rama isip iyang secretary on special projects ang kanhi assistant secretary sa Department of Social Welfare and Development (DSWD) nga si Ramil Ayuman.
Sa taho sa Public Information Office, gibutyag ni Rama nga motabang usab si Ayuman sa pipila ka mga proyekto ug inisyatibo sa Cebu City Disaster Risk Reduction Management Council (CCDRRMC) .
Kauban si CCDRRMC Chairman Atty. Gerry Carillo, mangulo usab si Ayuman sa recovery sa three-meter easement sa kasapaan.
Motabang usab siya sa pag-oversee sa pagpahimutang sa container van shelters alang sa mga maapektohan sa clearing operation.
Sa pakighinabi ni Ayuman sa Banat News, gitataw niya nga nangita na karon sila og pundo aron makab-ot ang gitingoha nga container vans.
Ang Cebu City Disaster Risk Reduction Management Office ug Cebu City Division for the Welfare of the Urban Poor (DWUP) maoy mangita sa mga lugar nga butangan niini.
Gipasalig ni Ayuman ngadto sa katawhan nga buhaton gyud niya ang mandato nga pinasubay sa kamandoan sa mayor.
Dili na bag-o alang kaniya ang paghupot og posisyon sa Kagamhanan sa Siyudad sa Sugbo, ug nahimo na siya nga hepe kaniadto sa CCDRRMO atol sa administrasyon ni anhing Mayor Edgardo Labella.
Nahimo usab siya nga kapitan kaniadto sa barangay Apas sa siyudad sa Sugbo. — MEL (BANATNEWS)
- Latest