Mga karsada sa ubang lugar sa habagatan ug Cebu City nahulpa

CEBU, Philippines — Gipahimangnoan sa opisyales sa Barangay Guadalupe, Dakbayan sa Carcar ang mga motorista nga maghinay inig agi diha sa Sitio Graje sa Barangay Guadalupe.

Kini human nihulpa na usab ang usa ka lane sa karsada gumikan sa sunod-sunod nga pa g-uwan.

Si Konsehal Rey Anthony Lawas sa Barangay Guadalupe nagkanayon nga magsige na gyud kini og hulpa ang lugar matag adunay mga pag-uwan.

Apan niining higayona nikawat na gyud sa pikas lane ang pagkahulpa.

Matud ni Lawas nga ilaha nang napahibawo ang taga Department of Public Works and Highway (DPWH) aron mahatagan og solusyon ang pagkaguba sa karsada.

Gilaoman usab nga adunay pagkabara sa dagan sa trapiko tungod kay usa ka lane lang una ang maagian.

Gibutyag ni Lawas nga dili lang sa maong lugar sila nipahimangno lakip na usab sa mga namuyo diha sa daplin sa kasapaan.

Sa laing bahin, nitabon ang yuta ug bato sa tibuok karsada diha sa Purok Santol, Barangay Campo 4, Dakbayan sa Talisay kagahapon sa kadlawon.

Ug gumikan niini ang mga motorist namalik ug nituyok sa ilang again.

Si Kapitan Rowena Briones-Edar nagkanayon nga alas 3:00 sa kadlawon nahitabo ang pagdahili sa yuta.

Giingong hinay ra ang uwan sa ilang dapit apan ang paghumok sa yuta maoy posibleng hinungdan sa pagtabon sa yuta ug bato sa tibuok karsada.

Sa pagkakaron, padayon ang mga trabahante sa QM builders sa paghawan sa yuta ug bato.

Nunot niini, nidahili usab ang yuta diha sa Lower Kawasan Monthpeller, Lungsod sa  Alegria.

Base sa taho sa Municipal Disaster Risk Reduction Management Office nga sa ilang gihimong assessment kagahapon ang maong pagdahili sa yuta gumikan mga pag-ulan.

Samtang sa Barangay Malolos, Lungsod sa Barili usab ka lane usab sa karsada ang maagian sa maong lugar human nalusno ang dalan nga padulong ngadto sa Lungsod sa Alonguinsan niadtong Martes sa tungang gabii.

Giawhag ni Mayor John John Garcia ang tanang moagi sa maong dapit nga magbantay tungod sa posibleng paglihok sa yuta ug ang mga molupyo sa lugar giawhag nga mobakwit na lang daan kon magsugod na ang pag-uwan.

Samtang si Konsehal Jerry Guardo sa Dakbayan sa Sugbo, chairman sa committee on infrastructure nagkanayon nga uban niya si Cebu City Mayor Michael Rama sa pagsusi sa mga bukirang barangay sa siyudad.

Gibutyag ni Guardo nga s Barangay Babag adunay dalan nga dako kaayo ang pagpangliki sa yuta diin 1/4 nalang ang nahibilin sa dalan ug delikado sa mga moagi.

Apan tungod kay national highway man kini ang Department of Engineering and Public Works (DPWH) niatiman na sa maong problema.

Sa Barangay Sirao adunay dunay pagdahili usab sa yuta. — Le Phyllis F. Antojado, Decemay P. Padilla/BDB (BANATNEWS)