Pagpatay sa 28 anyos nga lalake sa Kamagayan padayong gisusi
CEBU, Philippines — Padayon pa nga nipalalom sa ilang imbestigasyon ang kapolisan sa Dakbayan sa Sugbo, sa pagpusil patay sa 28 anyos nga lalaki nga si Jason Borces, diha sa barangay Kamagayan, niadtong Sabado sa hapon.
Kini ang gitug-an ni Police Lieutenant Colonel Wilbert Parilla, Deputy City Director for Administration nga nahinabi sa mga tigbalita.
Matud pa ni Parilla, aduna na silay gitan-aw nga CCTV camera nga ilaha karon gikomparar sa mga nanglabay nga shooting incident sa siyudad.
Lakip sa ilang gisusi mao ang background ni Borces, kinsa pila na ka higayon nga nasulod sa prisohan tungod sa kaso sa illegal nga drugas.
Si Parilla, nitug-an nga wala pa silay motibo sa pagpamusil apan wala nila gisalindot ang anggulo sa ginadili nga drugas ug wala pa usab silay matumbok nga person of interest.
Si Borces, residente sa Barangay San Jose, ug giingong nibisita lang kini sa iyang kapuyo dihang gipusil sa duha ka wala mailhing lalaki nga nagsakay og motorsiklo samtang naglingkod daplin sa dalan sa interior nga bahin sa barangay Kamagayan.— MEL (BANATNEWS)
- Latest
