Badian temporaryong nipahunong sa canyoneering

CEBU, Philippines — Temporaryong gipahunong sa kagamhanan sa Lungsod sa Badian ang canyoneering activity sa lungsod gumikan sa nasinati nga mga pag-ulan.  “Badian canyoneering is temporarily closed today due to rising of water level declared by the Municipal Disaster Risk and Reduction Management Office (MDRRMO)”,

kini base sa post diha sa social media account sa Municipal Tourism Office sa lungsod nga Breathtaking Badian.

Girekomendar ang temporaryong paghunong sa canyoneering tungod sa nabantayan nga pagsaka sa tubig sa maong dapit nga posibleng magdala og risgo kon ablihan ang maong site ngadto sa mga bisita.

“For now, nag-closed mi sa canyoneering. Dili pa exact date and time sa pag-open.  But we will assist tomorrow morning (karong buntag) if okay na ba ang water level”, matud sa usa ka tourism officer sa lungsod.

Nasayran nga bisan og way ulan sa downstream kuyaw gihapon ang tubig gikan sa upstream tungod kay posibleng mokalit lang ang kusog nga bul-og sa tubig. Ang canyoneering sa Badian maoy usa sa mga sikat nga tourism destination sa Probinsiya sa Sugbo diha sa habagatang kasadpan nga bahin sa probinsiya. BDB (BANATNEWS)