Nagduwa og kinatawo  gipadakop sa mga bata

CEBU, Philippines — Lalaki nga gikatahong nagduwa sa iyang kinatawo atubangan sa tulo ka mga minor de edad ang gidakop ug gipaslak sa prisohan sa lungsod sa Consolacion. Ang suspek nga si Rolie Degamo. 31, residente sa Sitio Sun-oc, Barangay Tayud, Consolacion gidakop sa mga barangay tanod human misumbong ang mga bata.

Matud pa ni Police Corporal Raymah Precia, Assistant WCPD sa Consolacion Police Station ang mga bata nag-rekord og video alang sa ilang vlog.

Sa dihang nahuman na sila ug padung na unta mamalik og snacks, nabantayan sa mga bata ang suspek nga nagpahipi diay dili layo sa ilang gikahimutangan ug nagduwa sa iyang kinatawo.

Daling nanagan ang mga bata padung sa mga tanod ug gisumbong ang suspek hinungdan nga kini gidakop ug gipasa ngadto sa kapolisan.

Ang maong lalaki nagtingkagol na karon sa lock-up jail ug gipaabot nga pasakaan og kasong kalapasan sa RA11313 o Safe Space Act.

Giawhag ni Precia, ang mga kababayen-an o kabataan nga motaho gilayon sa kapulisan kung sa ilang pamati naabuso na sila ug gibastos na.— IBM (BANATNEWS)