Duha ka barangay sa Talisay naa sa fault line

CEBU, Philippines — Duha ka bukirang barangay sa Talisay ang namarkahan nga adunay fault line base sa gihimong pagsusi niadtong Biyernes sa mga sakop sa Philvolcs ug MGB-7.

Ang grupo mianha sa Campo 3, Barangay Jaclupan ug sa Tapul aron kini markahan ug pahibaw-on ang mga residente nga dunay liki sa yuta nga posibleng matandog kun dunay kusog nga linog o ba kaha kun magdugay og bunok ang uwan sa kabukiran.

Ang fault line usa ka taas nga liki sa kalibutan diin diha magagikan ang paglihok sa yuta o ang linog. Si Mayor Gerald Anthony “Samsam” Gullas miingon nga sila sa lokal nga kagamhanan nagpahibawo niini sa mga residenti aron sila masayod na sa ilang dapit kung pananglit mo igo man ang katalagman.

Ang ilang gihimo mao ang pagbansay sa katawhan kung unsa ang ilang pagabuhaton sa higayon nga mo igo ang di maayong panghitabo.

Si Konsehal Danny Caballero, chairman sa committee on Disaster Resilience niingon nga dako nilang pasalamat sa taga PhilVolcs ug MGB-7 nga sila ang giuna sa pagbisita sa tibuok rehiyon-7 aron sila makapangandam.

Matud pa ni Caballero nga di man kalikayan nga mabalaka apan ang pagampo ug ang adunay kasinatian sa pagtubag sa bisan unsa nga katalagman maoy isipon nga taming.

Nagkanayon ang konsehal nga mobalik ang sakop sa City Disaster Risk Reduction and Management Office (CDRRMO) aron sa pagbansay sa katawhan panahon nga moigo ang katalagman. Sa laing bahin, nahimong mananaog ang Disaster Team sa Dakbayan sa Talisay sa gipahigayon nga tulo ka adlaw nga Inter-City DRR Rescue Challenge 2022 sa mga Syudad sa probinsya sa Sugbo nga gipahigayon didto sa Danao City. Ang kalihukan gihimo subay sa Disaster Resilience Month nga gipasiugdahan sa kagamhanan sa Syudad sa Danao.

Tinguha sa maong kalihukan ang camaraderie sa grupo sa rescue team sa nagkalain-laing siyudad sa probinsya.

Ang Talisay Rescue Team pinangulohan ni Alvin Santillana maoy nahimong champion sa nagkadaiyang kompetisyon kung unsa ang sitwasyon sa pagluwas og tawo.

Ang grupo gilangkuban nila ni Joshua Mahinay, John Mark Fernandez, Gregorio Albeos, Keeven Pinili, Karl Kenneth Yang, Aaron James Borromeo, Mike Thereso Belleza ug si Beah Margette Borromeo.

Si Konsehal Danny Caballero, chairman sa committee on Disaster nidayeg sa grupo.— IBM (BANATNEWS)