Lugway sa pag-abang sa bigfoot sa srp gitugotan

CEBU, Philippines — Gihatagan na sa Konseho sa Dakbayan sa Sugbo og pagtugot si Mayor Michael Rama sa pagrepresentar sa siyudad alang sa pagsulod ug pagpirma sa Supplemental Contract of Lease uban sa Bigfoot Entertainment Philippines, Inc., partikular na sa paglugway sa termino sa pag-abang niini sa usa ka property sa South Road Properties (SRP) sa laing 25 ka tuig o hangtod sa 2057.

Si Konsehal Jocelyn Pesquera nipasiugda og resolusyon kalabot sa maong butang nga giaprobahan sa konseho.

Si Pesquera niingon nga si Michael Gleissner, Direktor sa Bigfoot Entertainment Philippines, Inc. nisuwat kang Rama nga naghangyo nga lugwayan ang termino sa pag-abang niini sa SRP og laing 25 ka tuig.

Ang Bigfoot adunay kasamtangan nga Contract of Lease sa kagamhanan sa dakbayan, nga gisudlan  niadtong Pebrero 21, 2007 ug Supplemental Contract of Lease nga gisudlan niadtong Pebrero 5, 2008 alang sa pag-abang sa 2 ka ektarya nga lote sa SRP.

Ang kasamtangan nga termino sa pag-abang sa Bigfoot gipaabot nga matapos sa Pebrero 29, 2032.

Nakita sa buhatan ni Pesquera nga makiangayon lang gyud ang paghatag og lugway  sa Bigfoot sanglit nakahatag usab kini og kontribusyon sa ekonomiya sa dakbayan.

Nakatabang usab ang maong kompanya sa pakigkombate sa siyudad batok sa gisagobang niini nga pandemya.

Kahinumdoman nga gipagamit sa Bigfoot ang ilang area diin gihimo kini nga quarantine center o New Normal Oasis for Adaptation and a Home (NOAH) Complex, hangtud nga gihimo usab nga vaccination site. MEL (BANATNEWS)