24 ka tawo nadakpan sa SACLEO

CEBU, Philippines — Miabot sa 24 ka mga indibidwal ang nasikop sa kapulisan sa Dakbayan sa Talisay sa gihimo nga Simultaneous Anti-Criminality Law Enforcement Operation (SACELO) niadtong miaging adlaw.

Si Police Lt. Col. Randy Caballes, hepe sa kapolisan nibutyag nga ilang gihimo ang operasyon sa managlaing barangay sa Talisay.

Kini aron sa pagpakita sa Talisaynon nga sila naglihok alang sa pagpaubos sa kriminalidad, makuha ang mga gipangitang mga tawo nga adunay kalapasan sa balaod ug pagpatuman pa sa mga ordinansa sa Dakbayan.

Sa operasyon sa batok sa ilegal nga drugas sila nakadakop og unom ka durugista lakip na ang pagkumpiska sa usa ka armas.

Ang mga sugarol ang ilang gidakop nga moabot sa 13 ka indibidwal, lima ang ilang nasikop pinasikad sa warrant of arrest.

Upat ka armas ang gisurender ug 20 ang nasikop nga nakalapas sa lagda sa karsada.

Sa drugas aduna silay 235 gramos nga shabu nga nasakmit nga adunay gibana-bana nga balor nga P1,598,000.

Sa laing bahin, ang kapolisan sa Presinto 3 sa Lapu-Lapu City Police Office (LCPO) nakasakmit og armas ug gituohang shabu gikan sa pusher nga ilang nsdakpan sa buy bust operation sa Barangay Babag.

Si Police Major Narciso Abapo, hepe sa Presinto 3 sa LCPO miila sa ilang nadakpan nga mao si Junnel Alegre, 47, nagpuyo sa maong dapit.

Matud pa ni Abapo nga nakadawat sila og.mga report labot sa ilegal nga kalihokan sa maong lugar

Kini ang hinungdan nga gihimo nila ang buy bust operation nga miresulata sa pagkasikop niini.

Nasakmit gikan niini ang napulo ka gramo nga shabu nga nagkantidad og P70, 000 ug armas nga kalibre .38 nga adunay duha ka mga bala.— Romeo T. Limpangog/IBM (BANATNEWS)