P103 milyones shabu nasakmit sa buybust ops

CEBU, Philippines — Nasakmit sa joint buy bust operation sa City Drug Enforcement Unit (CDEU)  ug  City  Intelligence Unit (CIU) sa Lapu-Lapu City Police Office (LCPO) inabagan sa Philippine Drug Enforcement Agency ang 15 kilo nga gituohang shabu nga nagkantidad og P102 milyones gikan sa duha ka gipasanginlang drug pushers diha sa Barangay Poblacion sa Siyudad sa Lapu-Lapu kagahapon Sabado sa buntag. Si Police Major  oey Bicoy sa CDEU  ug Lieutenant Noah Anana nga ubos sa kamandoan sa ilang hepe sa CDEU ug CIU sa Lapu-Lapu City Police Office (LCPO) nga si Lieutenant Colonel Jul Mohammad Jamiri.

Si Bicoy miila sa ilang mga nadakpan nga mao sila si Eric Bacalso Isida, 46, taga Block 13, Lot 23, Rosas Street, Ilang-Ilang, Lindavalle Subdivision sa Siyudad sa Tagbilaran sa Lalawigan sa Bohol ug Neil James Plaza Vallesquina, 28, nga taga Lagkaan, Dasmariñas, Cavite.

Ang duha gikatahong konektado sa  una nilang nadakpan nga babayeng nakuhaan usab og upat ka kilong shabu.Ang duha ug ang maong babaye subject sa Oplan Double Saint Anger operation nga gilihok sa kapolisan aron pagpuhag sa ilang grupo diha sa maong dakbayan.

Si LCPO Police Director Lieutenant Colonel Arnel Banzon miingon nga  gikan sa Metro Manila ang shabu nga gidala sa duha pinaagi sa land trip.

Si Mayor Junard ‘Ahong’ Chan nga mipadayag sa iyang kalipay sa kalampusan sa maong operasyon.

“Walay luna ang ilegal nga drugas dinhi sa atong siyudad, ang kalamposan nagpakita sa kakugi pagtrabaho sa atong kapolisan nga dili ta masudlan og ilegal nga drugas dinhi sa ato,” matud pa sa mayor.

Si Chan namahayag sa mga tigbalita nga magpabilin ang iyang nahaunang pamahayag nga hatagan og tag P50 mil nga cash incentives ang mga law enforcement units nga makasakop og bigtime drug suspects sa siyudad.

Talisay city

Sa laing operasyon batok ilegal nga drugas,  gibanabanang usa ka milyon ka pesos nga kantidad sa gituohang shabu ang nasakmit sa kapulisan sa Dakbayan sa Talisay sa sunod-sunod nila nga operasyon gikan sa namaligya nga una nilang nadakpan hangtud sa iyang gikuhaan.

Gisugdan ang operasyon nila ni Police Lt. Elwood Ebona diha sa Sitio Tunga, Barangay Tanke mga 1:28 sa kaadlawon nga niresulta sa pagkasikop ni John Maverick Gabisay alyas JM, 20. Nakuhaan kini og 50 gramos nga gituohang shabu nga adunay balor nga P340mil.

Matud pa nga mitug-an kini nga ang shabu nga iyang gipangbaligya gikan sa ginganlan og Roy Vinculado nga nagtago-tago didto sa lungsod sa Cordova.

Mga alas 2:44 sa kaadlawon nasikop sab sila si Jay-Ar Edoloverio alyas JR, 37, ug si Griselda Abaño alyas Inday, 33, diha sa sitio Kilawan, Barangay Tanke.

Pulos sila mga drayber sa e-bike nga mao ang ilang plantalya sa ilang ilegal nga kalihukan. Nakuha gikan kanila ang shabu nga 25 gramos nga adunay balor nga P170 mil.

Mga alas 4:05 sa kaadlawon nasikop si Mary Faith Vinculado alyas Faith, 25, diha sa sitio Sawsawan, Barangay San Roque nga nakuhaan og 100 ka gramos nga gituohang shabu nga gibanabanang balor nga P680mil.Matud pa ni Ebona nga si Vinculado adunay usa ka anak samtang nagsabak sab kini og duha ka buwan.  Siya maoy nagsilbing courier sa drugas sa iyang amahan nga si Roy Vinculado nga naa sa Cordova nga adunay koneksyon sa binilanggo sa CPDRC nga ginganan og Pilorio.

Matud pa nga ang mabdos nga si Vinculado maoy tighatdanan og drugas kang Gabisay.

Toledo city

Sa laing operasyon, nasikop sab mao ang babaye ug lalaki nga managkapuyo diha sa Sitio Dascuna sa Barangay Don Andres Soriano sa Siyudad sa Toledo.

Si Police Lieutenant Colonel Dennis de Guzman, hepe sa kapolisan sa maong siyudad miila sa ilang mga nadakpan nga mao sila si Roderick Sollano, usa ka animal technician, 42, ug Rutchen Buglosa, 39, nga usa ka beautician.

Nakuhaan ang duha og 21 ka medium size nga paketeng gituohang shabu atol sa operasyon. —/IBM (BANAT NEWS)