DOTr Secretary Tugade mi-inspeksyon sa CCLEX

CEBU, Philippines — Gi-inspection ni Department of Transportation (DOTr) Secretary Arthur P. Tugade ang 8.9-kilometer Cebu-Cordova Link Expressway (CCLEX) niadtong miaging adlaw.

Si Tugade gikuyogan nila ni Land Transportation Office (LTO) 7 Director Victor Caindec, Cebu Ports Authority (CPA) General Manager Leonilo Miole, Mactan-Cebu International Airport Authority (MCIAA) General Manager Julius Neri Jr., DOTR Undersecretary Atty. Giovanni Lopez, Toll Regulatory Board Executive Director Atty. Alvin Carullo, mga opisyal sa Philippine Coast Guard ug ubang transportation industry executives.

Gihangop usab si Tugade sa mga opisyal sa Cebu Cordova Link Expressway Corporation (CCLEC), pinanguluhan sa ilang president ug General Manager Allan G. Alfon.

Gihimug atan sa mga opiyal ang dakung suporta sa DOTr ug ubang ahensiya sa kalamposan sa pagtukod sa CCLEX.

Sa nasayran upat ka tuig nga gitrabaho ang CCLEX nga wala nabalda ang shipping traffic sa Mactan Channel ingon man sa Port of Cebu nga gikontrolar usab PCG ug CPA.

Samtang ang Civil Aviation Authority of the Philippines, maoy mi aprobar sa height clearance sa duha ka main tower sa CCLEX nga dunay gitas-on nga 145 meters.

Suma pa sa CCLEC nga ang suporta sa National Government, apil na sa  DOTr, daku og gikatampo sa  pagkompleto sa proyekto nga gi inagurahan ni President Rodrigo Duterte niadtong  April 27, 2022 ug gibuksan sa publiko niadtong April 30, 2022.

Ang pagkatukod sa CCLEX, nga giilang bag-ong iconic landmark sa Sugbo nalantawan nga dili lang makasulbad sa kahuot sa dagan sa trapiko kundili makapalambo usab sa ekonomiya sa Probinsiya sa Sugbo, base sa pagtuon sa University of San Carlos. — MEL (BANAT NEWS)