Tulo ka gasoline stations dili sakto ang calibration sa pump

CEBU, Philippines — Tulo ka gasoline stations sa Dakbayan sa Sugbo ang gipadalhan og notisya human giingong dili sakto ang calibration sa ilang mga pump.

Kini ang gibutyag ni Police Lieutenant Colonel Wilbert Parilla, deputy director for administration.

Matud ni Parilla nga human sa direktiba ni Mayor Michael Rama nga magtukod og team nga magsusi sa mga gasoline station pagsuta kong sakto ba ang mga pump.

Ang maong team nipahigayon sa pagsusi sa mga gasoline station sa siyudad niadtong Lunes.

Ang kapolisan uban sa Prevention, Restoration, Order, Beautification and Enhancement (PROBE) ug Cebu Environmental Sanitation and Enforcement Team  (CESET) nihimo og inspection. Ug niadtong adlaw nga Miyerkules adunay tulo ka gasoline stations ang nasakpan nga depektoso ang calibration sa ilang mga pump.

Ang tulo ka gasoline stations una nahimutang diha sa V. Rama diin unom ka pump niini wala masakto ang calibration, ikaduha diha sa may N. Bacalso Pardo diin lima ka pump ang dili sakto ang calibration  ug ikatulo diha sa Punta Princesa diin adunay tulo ka pump ang dili usab sakto ang pagka-calibrate.

Gibutyag ni Parilla nga ang maong mga pump sa nahisgutang gasoline stations nga dili tukma pagka-calibrate ang gisirado lang una aron dili kini magamit.

Ang maong mga gasoline station gipadalhan kini og notisya aron ipatarong ang calibration sa ilang mga pump ug pasumitihon usab sila og eksplinasyon kabahin niini.

Matud usab ni Parilla nga gipaabot nila ang resulta sa inspection sa ubang mga gasoline station.

Nunot niini, ang mga namaligya og minudo nga gasoline diha sa kabukiran gihisgutan usab kini sa grupo tungod kay posibleng mao unya kini ang hinungdan sa sunog.

Giawhag sa kapolisan ang mga gagmay nga magpapatigayon nga likayan ang pagbaligya ug minudo nga gasolina aron malikay sa disgrasya. —BDB (BANATNEWS)