Bus midumbol sa  trak, walo naangol

CEBU, Philippines — Walo ka tawo ang naangol human ang ilang gisakyan nga bus midumbol sa 10- wheeler truck diha sa Cebu South Coastal Road (CSCR) sa Barangay Cansojong, Dakbayan sa Talisay kagahapon sa buntag.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga paingon sa siyudad sa Sugbo ang duha ka sakyanan.

Samtang nagdagan ang truck kalit lang nga nilagubo ang luyong bahin niini human kini gidumbol sa pampasaheroang bus.

Matud pa ni Tumulak nga ang drayber sa bus niangkon nga wala mokupot ang brakes hinungdan nga sila nasampak sa lubot sa truck.

Ang drayber sa bus nakuha ra apan nibalibad nga magpadala sa tambalanan samtang ang walo ka pasahero ang nakaangkon lang og minor injuries human sila nangalagpot sa atubangan.

Ang drayber sa bus mao si Roger Pega, 51 anyos sa KMK bus nga adunay rota Naga City-Cebu City.  Matud pa niya nga ni basiyo gyud ang sa bus hinungdan nga naigo nila ang    truck.

Nabalda ang dagan sa trapiko apan nabalik na kini sa normal human nasibog ang duha ka sakyanan nga nagbabag sa karsada.

Sa pikas bahin, gipangusgan sa mga sakop sa City of Talisay-Traffic Operation Development Authority (CT-TODA) ang pagdakop sa mga sakyanan nga di motuman sa signage nga “Left Lane Must Turn Left.”

Kini tungod kay duna nay ubay-ubay nga naaksidente  gumikan sa wala paghatag og pagtagad sa maong pahimangno sa      karsada.

Sa labing uwahing natalang aksidente may kalabotan sa wala pagsunod niini mao ang kamatayon sa 66- anyos nga lalaki nga nagmaneho og motorsiklo nga nalatayan sa 10 wheeler truck dili palang dugay diha sa Cebu South Coastal Road.

Ang biktima nagpaabot nga mo go ang signal apan ang suspek nipadagan sa sa gikahimutangan hinungdan nga nadumbolan ug nalatayan sa truck ang biktima.

Si Tumulak mibutyag nga tungod sa nahitabo giestrikto nila ang pagpasunod niini hinungdan nga 13 ka mga drayber ang ilang naisyuhan og

citation tickets.— IBM (BANATNEWS)