Paspas nga pag-proseso sa bldg permit gipasigarbo sa OBO
CEBU, Philippines — Bisan pa og naapektuhan ang ekonomiya tungod sa COVID-19 ug mga katalagman, nagpadayon ang pagtukod og dugang mga edipisyo dinhi sa siyudad sa Sugbo.
Sa taho sa Public Information Office (PIO) sa dakbayan, misaka ang gidaghanon sa mga indibidwal nga nagkuha og building permit gikan sa Office of the Building Official (OBO) sukad niadtong Disyembre sa miaging tuig.
Si Building Official Florante Catalan miingon nga kadaghanan sa mga proyekto, diin ang building permit gikuha alang sa pagtukod og mga condominium.
Dugang ni Catalan nga usa sa nakaingganyo sa mga aplikante mao ang paspas nga proseso sa pagkuha sa permit.
“Ang mga investors, ang mga developers, paspas na gyud kaayo na sila magkuha sa ilang mga applications, mag-apply kay lipay man sila sa atong services. Wala naman tay corruption, wala nata anang hinay-hinay, wala na ta anang dugay-dugay, diba? Unsa pa may dugayan?” matod niya.
Base sa rekord sa OBO, 468 ang mi-apply og building permit gikan sa Disyembre 2021 hangtod karon o sulod sa unom ka buwan, ug 395 niini ang naaprobahan na.
“For fencing permit, 17 unya ang na-approved ana is 10. Ang kanang wala pa na approve naa pa nay mga deficiencies for them to comply kay di man gud pwede siya nga aprobahan lang nga dili siya ma-comply ba,” matod ni Catalan.
“So, ang numbers lang if imohang kwentahon, more gyud ang applications. Maski naa pay pandemic, naa gihapon siyay nag-apply,” dugang niya.
Bahin sa paspas nga pag-isyu og permit, si Catalan niingon nga tungod kini sa bag-ong sistema sa OBO.
“One day lang mo-process og building permit… Naggamit ta og system nga gitawag nato og OBO IS Version 3. Pasabot ana, inig-submit nimo diri, pwede gani ka mag-file sa imong application online. Not necessary nga moari pa ka diri. Usa ka adlaw human na. Pwede gani nimo huwaton,” segun niya.
Tungod niini, nakakolekta na ang OBO og katunga sa ilang annual collection target nga P100 milyones.
“From January 2022 to present, ang atong nakuha na nga income sa OBO is naa na sa mga P52 million na. Wala pa kaabot og katunga sa tuig nakuha na nato,” matud ni Catalan. MEL (BANATNEWS)
- Latest
