Mga drayber sa traysikol hatagan og discount card

CEBU, Philippines — Si Cebu City Councilor James Cuenco, chairman sa committee on transportation sa konseho sa siyudad nibutyag nga hatagan nila og discount cards sa gasolina ang mga rehistrado nga tricycle driver. Gianunsiyo kini ni Cuenco atol sa iyang pakigtigom sa mga opisyal sa nagkadaiyang barangay, mga representante sa nagkadaiyang asosasyon sa mga operator ug drayber sa traysikol.

Ang discount card kabahin kini sa programa sa siyudad nga “Gasolina Mo, Sagot Ko” program alang sa mga public utility vehicle (PUVs) ug katambayayong sa siyudad niini ang pipila ka Phoenix gasoline stations.

Ang maong proyekto nagdasig usab kini sa mga kolorum nga drayber sa traysikol nga magpa-rehistro na.

Nasayran nga tungod sa kamahal na sa presyo sa gasolina naumol sa siyudad ang maong programa aron mamenosan ang giatubang nga suliran sa mga drayber.

Gikataho nga magpabiling P15 ang plitehan sa mga traysikol sa Siyudad sa Sugbo ug siguradohon lang sa mga drayber nga tulo ra gyud  ka pasahero ang ilang kargahon.

Ang maong sitwasyon obserbahan sa kagamhanan sa Siyudad sa Sugbo ug mohimo dayon og assessment alang sa sunod nila nga lakang. Nasayran usab nga si Cuenco nakadawat og reklamo gikan sa pipila ka commuters kabahin sa P15 nga plite sa tricycle bisan og makapasakay na kini sa full capacity.

Kaniadto sa wala pa ipatuman ang social distancing sa mga tricycle P10 lang ang plite niini.

Matud ni Cuenco nga tumong sa maong tigom nga makakab- ot og makiangayon nga sestema nga patas sa mga drayber ug commuter. Ang kagamhanan sa siyudad mogama og adjustment ubos sa resulta unya sa evaluation.

Samtang ang Cebu City Transportation Office (CCTO) mohimo usab og lapad nga pag-roving alang sa pagsita sa mga kolorum nga mga tricycle unit.

Sa unang bahin sa buwan sa Hunyo papitlan na og stickers sa siyudad ang mga lehitimong tricycle. — (/BDB)